រដូវវស្សាឈានចូលមកដល់ភ្លាម ឃើញថារុក្ខជាតិទាំងឡាយចាប់ផ្តើមលូតលាស់ថ្មី បន្ទាប់ពីព្រះភិរុណបានបង្អុរភ្លៀងធ្លាក់ចុះ មកស្រោចស្រពលើផែនពសុធា ជាបន្ដបន្ទាប់។
បើយើងក្រឡេកទៅមើលទិដ្ឋភាពប្រាសាទអង្គរវត្ត ឬ ប្រាសាទអង្គរតូច ដែលស្ថិតនៅភាគខាងជើងនៃក្រុងសៀមរាបឯណោះវិញ ឃើញថា បន្ទាប់ពីត្រូវទឹកភ្លៀងនារដូវវស្សាធ្លាក់មកជាច្រើនមេ ចាប់ផ្តើមលូតលាស់ត្រួយថ្មីខៀវស្រងាត់ពាសពេញដីហាក់បីដូចជាកម្រាលព្រំពណ៌បៃតង បង្កើតបានជាទស្សនីយភាពមួយជួយលើកសម្រស់ទិដ្ឋភាពនាប្រាង្គប្រាសាទដ៏ល្អឯកមានតែមួយគ្មានពីរលើលោកនេះ កាន់តែល្អមួយកម្រិតថែមទៀត។
ជាក់ស្តែង តាមរយៈរូបភាពនាពេលព្រឹកព្រលឹម បន្ទាប់ពីទឹកសន្សើមបង្អុរចុះពីលើមេឃចែងចាំងពន្លឺជះរស្មីពណ៌ភ្លឺផ្លេកលើប្រាសាទអង្គរវត្ត ដែលកំពុងតែល្បីល្បាញលើបណ្ដាញសង្គមហ្វេសប៊ុកថ្មីៗនេះ ឃើញថាទិដ្ឋភាពនៅអង្គរ ពិតជាស្រស់ស្អាតក្រៃលេង គយគន់មើលទៅហាក់ដូចជារស់រវើកស្អាតអស្ចារ្យតែម្តង និង បានក្លាយទៅជាទិសដៅរបស់ភ្ញៀវទេសចរទាំងឡាយប៉ងចង់ទៅទស្សនា ថតរូបផ្តិតយកនូវទស្សនីយភាពល្អល្អះនេះ ក្រោយកូវីដ-១៩ បានបញ្ចប់៕
រូបភាពដោយ ៖ Sanith Prohm
អត្ថបទដោយ៖ Tomson
