ទិដ្ឋភាពបឹងយក្សអោម នៅរតនគិរី ថតពីលើអាកាស មើលមួយភ្លែតដូចមុខមនុស្សភពផ្កាយ

ខេត្តរតនគិរី ជាខេត្តមួយស្ថិតនៅភូមិភាគឦសាននៃប្រទេសកម្ពុជា សម្បូរទៅដោយតំបន់ខ្ពង់រាប និង សមុទ្រព្រៃឈើគួរជាទីគយគន់ ។ រតនគីរីត្រូវបានគេស្គាល់ថាជាខេត្តមួយដែលមានទេសភាពស្អាតស្រស់ត្រកាល មានផ្លូវបត់បែនវែងអន្លាយ មានទេសភាពធម្មជាតិ និង តំបន់ទេសចរជាច្រើនអនែក ជាទីឋានសួគ៌សម្រាប់ភ្ញៀវទេសចរមកពីគ្រប់ទិសទីប៉ុនប៉ងចូលទៅទស្សនា ។

ជាក់ស្ដែង បើយើងធ្វើដំណើរចេញពីរង្វង់មូលវិមានឯករាជ្យក្រុងបានលុង ទីរួមខេត្តរតនគិរី ប្រមាណជា ៦៥ គីឡូម៉ែត្រ ឆ្ពោះទៅកាន់ភូមិណងហៃ ឃុំសេដា ស្រុកលំផាត់ ខេត្តរតនគីរី នោះប្រិយមិត្តនឹងទៅដល់បឹងធម្មជាតិយ៉ាងធំមួយគូស្រោបជុំវិញទៅដោយព្រៃព្រឹក្សាជុំជិតឈ្មោះថា «បឹងយក្សអោម» ឬ «យក្សក្រា» ដែលអ្នកស្រុកតែងហៅម៉្យាងទៀតថា «បឹងភ្លោះ» ។

ជារឿងមួយដែលប្លែកកម្រនឹងបានឃើញ «បឹងយក្សអោម» ដែលជាបឹងដ៏ស្រស់ស្អាតមានទឹកថ្លាយង់មើលឃើញដល់បាតដី មានរុក្ខជាតិបៃតងពណ៌ខៀវស្រងាត់ដុះហ៊ុមព័ទ្ធជុំវិញ ហើយមានសណ្ឋានរូបរាងដូចមុខមនុស្សភពផ្កាយ ដែលគេនិយមហៅថា «Alien» ។

យ៉ាងណាមិញ សម្រាប់ភ្ញៀវទេសចរទាំងឡាយណាដែលចូលចិត្តកម្សាន្តនៅបឹងធម្មជាតិ «បឹងយក្សអោម» ពិតជាមិនខកបំណងឡើយ ដោយនៅទីនោះភ្ញៀវអាចងូតទឹកលេង គេងបោះតង់ គយគន់ទេសភាពបែបធម្មជាតិ ស្រូបយកខ្យល់អាកាសបរិសុទ្ធ ស្តាប់សំឡេងសត្វច្រៀងបំពេកំដរអារម្មណ៍ ថែមទាំងអាចរៀបចំអាហារដោយខ្លួនឯងផងដែរ ៕

រូបភាពដោយ ៖ AMS