បន្ទះឈីបក្នុងខួរក្បាលថ្មី អាចឱ្យមនុស្សប្រើប្រាស់បណ្ដាញសង្គម ដោយគ្រាន់តែគិត
អ្នកវិទ្យាសាស្ត្រ បានបង្កើតបន្ទះឈីបក្នុងខួរក្បាលថ្មីមួយ ដែលមានទំហំស្ដើងជាងសក់មនុស្សទៅទៀត នឹងថែមទាំងអាចឱ្យមនុស្សប្រើប្រាស់បណ្ដាញសង្គមនានាបាន ដោយគ្រាន់តែប្រើប្រាស់ការគិតមកបញ្ជា។
បន្ទះឈីបដ៏អស្ចារ្យមួយនេះដែរ គឺបង្កើតឡើងជាពិសេសសម្រាប់ជនមានពិការភាព ដែលមិនអាចប្រើប្រាស់ដៃជើងរបស់ពួកគេ ក្នុងការទំនាក់ទំនងគ្នាបានតាមប្រព័ន្ធកុំព្យូទ័រនោះ។ យ៉ាងណាមិញ សម្រាប់អ្នកដែលមានរាងកាយរឹងមាំទូទៅ ក៏អាចប្រើប្រាស់បន្ទះឈីបមួយនេះបានដូចគ្នាផងដែរ។
បន្ទះឈីប ដែលអ្នកវិទ្យាសាស្ត្ររកឃើញនេះដែរ មានឈ្មោះថា Layer 7 Cortical Interface វាគឺមានលក្ខណៈខុសប្លែកគ្នាពីបច្ចេកវិទ្យាដែលបង្កើតឡើងដោយក្រុមហ៊ុនរបស់លោក Elon Musk ព្រោះថា ឈីបនេះ គឺបំពាក់នៅលើផ្ទៃរបស់ខួរក្បាល ជាជាងដាក់ក្នុងជាលិកាខួរក្បាល ដែលជាហេតុធ្វើវាមានសុវត្ថិភាព មិនប៉ះពាល់បំផ្លាញដល់ជាលិកាណាមួយឡើយ។
ម្យ៉ាងវិញទៀត ក្នុងការដាក់បន្ទះឈីបនេះដែរ គឺក្រុមគ្រូពេទ្យ មិនទាមទារធ្វើការវះកាត់ធំដំអ្វីឡើយ ដោយគ្រាន់តែធ្វើការចោះរន្ធតូចមួយនៅលលាដ៍ក្បាល រួចស៊កចូលក្នុងខួរក្បាលជាការស្រេច ព្រោះថា បន្ទះឈីបមួយនេះ មានទំហំមិនដល់មួយមីលីម៉ែត្រផង ដូចនេះ អ្នកជំងឺមិនចាំបាច់ត្រូវកោរសក់ធ្វើការវះកាត់អ្វីនោះឡើយ។
គួរបញ្ជាក់ផងដែរថា បច្ចេកវិទ្យាថ្មីមួយនេះ បានតេស្តសាកល្បងលើសត្វដោយជោគជ័យហើយ ដូចនេះខាងអ្នកវិទ្យាសាស្ត្រ សង្ឃឹមនឹងទទួលបានការអនុម័តពីខាង FDA ដើម្បីធ្វើការសាកល្បងដោយផ្ទាល់លើមនុស្សនៅរយៈពេលប៉ុន្មានខែខាងមុខនេះ៕
