ស្ងាត់ៗ វៀតណាម បង្កើតឡានហោះ និង អាចហោះ ១០០គីឡូម៉ែត្រក្នុងមួយម៉ោង
កាលពីថ្ងៃទី ២៦ ដល់ថ្ងៃទី ៣០ ខែតុលា ឆ្នាំ ២០២២ កន្លងទៅ ក្រុមហ៊ុនមួយឈ្មោះ Airlios ដែលមានទីតាំងនៅទីក្រុងហាណូយ បានធ្វើការដាក់តាំងបង្ហាញគំរូរថយន្តថ្មីមួយប្រភេទដែលអាចហោះហើរលើអាកាសបាន ក្នុងកម្មវិធី Vietnam Motor Show ឆ្នាំ ២០២២។
គម្រោងផលិតរថយន្តប្រភេទថ្មីនេះដែរ ក្រុមហ៊ុន Airlios គឺកំពុងស្ថិតក្នុងដំណើរការបញ្ចប់ការផលិតឱ្យរួចរាល់ ជាមួយគោលដៅនាំយករថយន្តប្រភេទនេះដាក់លក់លើទីផ្សារក្នុងឆ្នាំ ២០២៤ ខាងមុខនេះ។ ជាមួយគ្នានោះដែរ តាមរយៈក្រុមហ៊ុនដដែលបានឱ្យដឹងទៀតថា ការច្នៃរថយន្តប្រភេទនេះ គឺក្នុងបំណងសម្រាប់ប្រើប្រាស់ក្នុងតំបន់មួយចំនួនដូចជា សម្រាប់ការសង្គ្រោះ ឬ ដឹកអ្នកដំណើរផ្សេងៗជាដើម។
ថ្លែងប្រាប់សារព័ត៌មាន VnExpress ប្រធានក្រុមហ៊ុនបច្ចេកវិទ្យា Airlios លោក Mai Thien.Vu បាននិយាយថា៖ «គិតមកទល់ពេលនេះ គម្រោងរថយន្តនេះ គឺធ្វើមកបាន ៧០ ទៅ ៨០ ភាគរយហើយ។ ពួកយើងគ្រោងនឹងនាំយកសមិទ្ធផលរបស់ Airlios មួយនេះ ធ្វើការសាកល្បងហោះហើរលើកដំបូងពីទីក្រុង Ha Tien ទៅកោះ Phu Quoc នៅចុងឆ្នាំ ២០២៣ ខាងមុខនេះ។ ប្រសិនបើការសាកល្បងនេះដំណើរការល្អ នោះរថយន្តហោះនេះ នឹងអាចដាក់លើទីផ្សារឱ្យប្រើប្រាស់ក្នុងឆ្នាំ ២០២៤ ខាងមុខផងដែរ»។
លោក Vu បានបន្ថែមឱ្យដឹងទៀតថា គំនិតច្នៃរថយន្តហោះនេះ គឺជាប្រភេទមធ្យោបាយធ្វើដំណើរថ្មីមួយ មិនត្រឹមតែមាននៅប្រទេសវៀតណាមប៉ុណ្ណោះទេ ប៉ុន្តែបណ្ដាប្រទេសផ្សេងលើពិភពលោកក៏មានដូចគ្នា ហើយប្រសិនបើរថយន្តនេះទទួលបានជោគជ័យ និង អាចដាក់ប្រើប្រាស់លើទីផ្សារបានលឿនតាមដែលយើងព្រៀងទុកនោះ ក្រុមហ៊ុន Airlios អាចជាក្រុមហ៊ុនបង្កើតរថយន្តហោះដំបូងគេនៅអាស៊ីអាគ្នេយ៍នេះ។
គួរបញ្ជាក់ផងដែរថា រថយន្តសាកល្បងដំបូងរបស់ក្រុមហ៊ុន Airlios គឺទទួលបានជោគជ័យលើការហោះហើរក្នុងល្បឿន ១០០ គីឡូម៉ែត្រក្នុងមួយម៉ោង ក្នុងរយៈពេល ២០ នាទី ជាមួយហោះហើររយៈចម្ងាយ ៣៣ គីឡូម៉ែត្រ និងក្នុងកម្ពស់ប្រមាណ ១២០ ម៉ែត្រ៕
