សំណាងនឹកស្មានមិនដល់មែន ក្មេងស្រីអាយុត្រឹម ៩ ឆ្នាំសោះ ត្រូវឆ្នោតមហាសាលរហូតដល់ ២ លើក !
ថ្មីៗនេះក្មេងស្រីជនជាតិអារ៉ាប់ម្នាក់បានឈ្នះរង្វាន់ជាទឹកប្រាក់ចំនួន ១ លានដុល្លារពីការចាប់សន្លឹកឆ្នោត ខណៈដែលគេដឹងថា កាលពី ៦ ឆ្នាំ មុននាងក៏បានឈ្នះរង្វាន់ជារថយន្ត McLaren តម្លៃ ២៦០០០០ ដុល្លារ ម្ដងរួចមកហើយ ពីការចាប់សន្លឹកឆ្នោតនេះ ។
ក្មេងស្រីសំណាងខាងលើមានឈ្មោះ Eilza អាយុ ៩ ឆ្នាំ ហើយចំពោះសន្លឹកឆ្នោតគឺឪពុកនាងជាអ្នកជួយជូនទិញ ។ ឪពុករបស់ Eilza គឺជាជនជាតិឥណ្ឌា ដែលបានមករស់នៅក្នុងប្រទេសអារ៉ាប់រួម អស់រយៈពេល ១៩ ឆ្នាំមកហើយ ចំណែកក្រុមហ៊ុនឆ្នោតផ្សងសំណាងនេះ មានឈ្មោះ Dubai Duty Free lottery ដែលជាក្រុមហ៊ុនឆ្នោតដ៏ធំនៅក្នុងទីក្រុងឌូបៃ ។
តាមសម្ដីឪពុករបស់ Eilza បានឱ្យដឹងថា កាលពីឆ្នាំ ២០១៣ ខណៈដែលកូនស្រីទើបតែមានអាយុ ៣ ឆ្នាំ ខ្លួនបានជូននាងទៅទិញឆ្នោតពីក្រុមហ៊ុនខាងលើម្ដងរួចមកហើយ ហើយកាលនោះក៏មានសំណាងឈ្នះបានរថយន្ត McLaren មួយគ្រឿង ហើយស្រាប់តែឆ្នាំ ២០១៩ នេះ ស្របពេលកូនស្រីចម្រើនវ័យបាន ៩ ឆ្នាំ លោកក៏បានជូននាងទៅទិញឆ្នោតម្ដងទៀត ស្រាប់តែត្រូវរង្វាន់ធំជាទឹកប្រាក់ចំនួន ១ លានដុល្លារតែម្ដង ។
គួរបញ្ជាក់ថា ក្រុមហ៊ុនឆ្នោតផ្សងសំណាងខាងលើ គឺតែងតែធ្វើកម្មវិធីចាប់ឆ្នោតនៅក្នុងព្រលានយន្តហោះអន្តរជាតិឌូបៃផ្ទាល់ ដើម្បីអនុញ្ញាតឱ្យទាំងភ្ញៀវអន្តរជាតិក៏អាចលេងឆ្នោតផ្សងសំណាងនេះបានដែរ ៕
ដោយ ៖ ម៉ានី
ប្រភព ៖ Dailymail