ទារិកាចម្លែក កើតមកមានម្រាមដៃ ១៤ ម្រាមជើង ១២ ត្រូវគេចាត់ទុកជាទេពធីតាចាប់ជាតិ

សារព័ត៌មាន Daily Mail នាពេលថ្មីៗនេះ បានចុះផ្សាយថា នៅក្នុងប្រទេសឥណ្ឌា មានទារិកាចម្លែកម្នាក់ ដែលកើតមកមានម្រាមដៃ ១៤ ម្រាមជើង ១២ ហើយត្រូវបានឪពុកម្តាយជឿថាជា ទេពធីតាចាប់ជាតិ។

យោងតាមប្រភពព័ត៌មានបានឱ្យដឹងថា ទារិកាមានម្រាមដៃ ម្រាមជើងចំនួន ២៦ ដែលកើតនៅមន្ទីរពេទ្យមួយក្នុងទីក្រុង Bharatpur ក្នុងរដ្ឋ Rajasthan ភាគខាងជើងប្រទេសឥណ្ឌា ដោយមានម្រាមដៃម្ខាងចំនួន ៧ និង ម្រាមជើងម្ខាងចំនួន ៦ ប៉ុន្តែភាពមិនប្រក្រតីនេះ វេជ្ជបណ្ឌិតបានប្រាប់ថាវាមានបញ្ហាមកពីហ្សែន។

យ៉ាងណាមិញ ទោះបីជាខាងក្រុមគ្រូពេទ្យប្រាប់ថា កូនស្រីរបស់ពួកគេមានបញ្ហាហ្សែន ក៏ក្រុមគ្រួសាររបស់ក្មេងតូចនោះនៅតែសប្បាយចិត្ត ព្រោះពួកគេយល់ថា នាងគឺជា ព្រះតេជគុណ Dholagarh Devi ដែលជាអាទិទេពដ៏ល្បីឈ្មោះក្នុងប្រទេសឥណ្ឌាព្រោះនាងបានកើតនៅជិតប្រាសាទរបស់ព្រះ។

ជាមួយគ្នានេះដែរ ម្តាយរបស់ទារិកានោះបានប្រាប់សារព័ត៌មានឱ្យដឹងដែរថា នាងមានឈ្មោះថា Sarju Devi អាយុ ២៥ ថ្ងៃ ហើយបានប្រាប់ទៀតថាឪពុករបស់ក្មេងស្រីនេះមានឈ្មោះថា Gopal Bhattacharya គឺជាប៉ូលិសម្នាក់នៅក្នុងកងកម្លាំងប៉ូលិសបម្រុងកណ្តាល សប្បាយចិត្តជាខ្លាំង ពេលបានដឹងថាកូនរបស់ខ្លួនមានម្រាមដៃ ម្រាមជើងដល់ទៅ ២៦ ដូចអាទិទេព៕

ប្រភព ៖ Daily Mail