អាកាសយានដ្ឋានអន្តរជាតិភ្នំពេញ កំពុងរៀបចំតុបតែងយ៉ាងស្រស់ស្អាតជាថ្មី ត្រៀមស្វាគមន៍ព្រឹត្តិការណ៍ប៉ារ៉ាហ្គេមលើកទី ១២

កាលពីថ្ងៃទី ២៥ ខែឧសភា ឆ្នាំ ២០២៣ កន្លងទៅក្រសួងព័ត៌មានបានចុះផ្សាយថា ពេលនេះអាកាសយានដ្ឋានអន្តរជាតិភ្នំពេញ កំពុងតែរៀបចំតុបតែងលម្អជាថ្មីម្ដងទៀតសម្រាប់ព្រឹត្តិការណ៍អាស៊ានប៉ារ៉ាហ្គេម លើកទី ១២ ដែលនឹងចាប់ផ្ដើមនៅដើមខែមិថុនាខាងមុខនេះ។

ក្រោយពីព្រឹត្តិការណ៍ការប្រកួតកីឡាស៊ីហ្គេម លើកទី ៣២ ឆ្នាំ ២០២៣ ដែលកម្ពុជា ធ្វើជាម្ចាស់ផ្ទះជាលើកដំបូង បានបញ្ចប់ទៅដោយជោគជ័យ និង មោទកភាព ជាថ្មីម្ដងទៀតកម្ពុជា ក៏ត្រូវធ្វើជាម្ចាស់ផ្ទះរៀបចំព្រឹត្តិការណ៍ប្រកួតកីឡាអាស៊ានប៉ារ៉ាហ្គេម ដែលជាធម្មតា តែងប្រារព្ធធ្វើឡើងក្រោយពេលស៊ីហ្គេម បានបញ្ចប់ និង ធ្វើឡើងរយៈពេល ២ ឆ្នាំម្ដងដូចស៊ីហ្គេមដែរ។

ក្រសួងព័ត៌មាន បានបញ្ជាក់ថា ការរៀបចំព្រឹត្តិការណ៍អាស៊ានប៉ារ៉ាហ្គេមនេះ ប្រាកដណាស់ថាកម្ពុជា នឹងធ្វើឱ្យបានល្អ មានភាពល្អិតល្អន់ និង ច្បាស់លាស់ ដើម្បីឱ្យព្រឹត្តិការណ៍នេះក្លាយជាបទពិសោធន៍ដ៏អស្ចារ្យថ្មីមួយបន្ថែមទៀត និង មិនអាចបំភ្លេចបានសម្រាប់ទាំងអស់គ្នា។ ហើយក្រោយពីបញ្ចប់ព្រឹត្តិការណ៍កីឡាអាស៊ី អាគ្នេយ៍ លើកទី ៣២ ឆ្នាំ ២០២៣ រួចរាល់ ទីតាំងពាក់ព័ន្ធទាំងអស់ ក៏ដូចជាអាកាសយានដ្ឋានអន្តរជាតិភ្នំពេញ បាននឹងកំពុងរៀបចំសារជាថ្មីម្ដងទៀត ដើម្បីត្រៀមស្វាគមន៍ ព្រឹត្តិការណ៍ ប៉ារ៉ាហ្គេម លើកទី ១២ ឆ្នាំ ២០២៣ ដែលឈានមកដល់ឆាប់ៗខាងមុខ។

គួរបញ្ជាក់ដែរ ព្រឹត្តិការណ៍អាស៊ានប៉ារ៉ាហ្គេម លើកទី ១២ នឹងចាប់ផ្ដើមពីថ្ងៃទី ៣ ដល់ថ្ងៃទី ៩ ខែមិថុនា ឆ្នាំ ២០២៣ ខាងមុខនេះ៕

រូបភាពដោយ ៖ ក្រសួងព័ត៌មាន