ប្រធាន FIFA រងការរិះគន់ដូចព្យុះ ក្រោយឈរថត Selfie ទាំងញញឹមក្បែរមឈូសរបស់ Pele
ប្រធានសហព័ន្ធកីឡាបាល់ទាត់អន្តរជាតិ FIFA លោក Gianni Infantino កំពុងរងការរិះគន់យ៉ាងខ្លាំង ក្រោយពីរូបលោកឈរថត Selfie ទាំងទឹកមុខញញឹមពព្រាយ ក្បែរមឈូសរបស់ស្តេចកីឡាករបាល់ទាត់ប្រេស៊ីល Pele។
កាលពីថ្ងៃទី ០២ ខែមករា ឆ្នាំ ២០២៣ កន្លងទៅ ប្រធានសហព័ន្ធកីឡាបាល់ទាត់អន្តរជាតិ FIFA បានធ្វើដំណើរទៅដល់ពហុកីឡដ្ឋាន Vila Belmrio នាក្រុង Santos ប្រទេសប្រេស៊ីលហើយ ដើម្បីអញ្ជើញចូលរួមពិធីបុណ្យសពរបស់ស្តេចកីឡាករបាល់ទាត់ Pele។
យ៉ាងណាមិញ វត្តមាននៃប្រធាន FIFA នាពិធីបុណ្យសពរបស់ Pele នេះ បែរជាទទួលរងការមិនពេញចិត្តខ្លាំងពីសំណាក់មហាជនជាច្រើនទៅវិញ ក្រោយរូបលោកបានបង្ហាញសកម្មភាពមិនសមរម្យ ឈរថត Selfie នៅក្បែរមឈូសរបស់ Pele។ មហាជនមួយចំនួនបានលើកឡើងថា លោក Gianni Infantino គឺពិតជាគ្មានការអៀនខ្មាស ខណៈមួយចំនួនក៏លើកឡើងធ្ងន់ៗថា ៖«តើគាត់ខ្លាចអត់បានថតរូបមែន? ទាំងដែល Pele សម្រាន្តនៅទីនោះ? ពិតជាមិនសមរម្យមែន»។
ទោះជាយ៉ាងណា ក្រោយទទួលរងមតិរិះគន់ដូចទឹកបាក់ទំនប់បែបនេះ លោកប្រធានសហព័ន្ធកីឡាបាល់ទាត់អន្តរជាតិ FIFA រូបនេះ ក៏បានធ្វើការបង្ហោះលើគណនី Instagram បកស្រាយប្រាប់មហាជនថា រូបលោកគឺមានអារម្មណ៍ថា ខកចិត្ត នៅពេលរងការរិះគន់បែបនេះ។ លោកបានបន្តទៀតថា កាលដែលលោកថត Selfie នោះគឺដោយសារតែក្រុមការងារ និង សាច់ញាតិរបស់លោក Pele ស្នើសុំថតរូបជាមួយលោក ហើយពួកគេមិនដឹងថាថតរបៀបមិច ទើបហុចទូរស័ព្ទឱ្យលោកជាអ្នកកាន់ថតបែបនេះ៕
