ក្ដៅៗ! អ្នកចាំទីកម្ពុជា ហ៊ុល គីមហុយ ឆ្លងកូវីដ-១៩ អំឡុងពេលបំពេញភារកិច្ចនៅឥណ្ឌា

ក្រោយបញ្ចប់ភារកិច្ច ក្នុងព្រឹត្តការណ៍ការប្រកួតពានរង្វាន់វគ្គជម្រុះ AFC Asian Cup នៅឯប្រទេសឥណ្ឌា គោព្រៃកម្ពុជាទទួលបានចំណាត់ថ្នាក់លេខ ៤ ក្នុងពូល ​D ដោយទទួលបានត្រឹមតែ ១ ពិន្ទុបុ៉ណ្ណោះត្រឡប់មកផ្ទះវិញ។ ពេលនេះអ្នកចាំទីដៃឆ្នើមរបស់គោព្រៃកម្ពុជា ហ៊ុល គីមហុយ តេស្ដឃើញវិជ្ជមានកូវីដ-១៩។ នេះបើយោងតាមការចុះផ្សាយរបស់ផេកហ្វេសប៊ុកផ្លូវការរបស់សហព័ន្ធកីឡាបាល់ទាត់កម្ពុជា។

ក្នុងនោះដែរ ផេកហ្វេសប៊ុកផ្លូវការរបស់សហព័ន្ធកីឡាបាល់ទាត់កម្ពុជា ក៏បានបញ្ចាក់ឱ្យដឹងដែរថា៖ «កីឡាករជម្រើសជាតិកម្ពុជា ១ រូប ហ៊ុល គីមហុយ បានឆ្លងវីរុសកូវីដ ១៩ អំឡុងពេលបំពេញភារកិច្ចចូលរួមប្រកួតពានរង្វាន់វគ្គជម្រុះ AFC Asian Cup នៅប្រទេសឥណ្ឌា។ ហើយពួកគេនឹងបន្តស្នាក់នៅ និង ព្យាបាលនៅប្រទេសឥណ្ឌារហូតដល់ជាសះស្បើយ​»។

សូមរំឭកផងដែរថា ក្រោយបញ្ចប់ភារកិច្ចក្រុមជម្រើសជាតិគោព្រៃកម្ពុជា បានរងការបរាជ័យក្រោមថ្វីជើងម្ចាស់ផ្ទះឥណ្ឌាក្នុងលទ្ធផល ២ ទល់នឹង ០ និង ចាញ់ក្រោមថ្វីជើងហុង កុង ក្នុងលទ្ធផល ៣ ទល់នឹង ០ និងការប្រកួតចុងក្រោយគឺគោព្រៃកម្ពុជាបានទទួលលទ្ធផលមួយយ៉ាងគាប់ប្រសើរ ដោយបានស្មើរជាមួយនឹងជម្រើសជាតិអាហ្វហ្គានីស្ថានក្នុងលទ្ធផល ២ ទល់នឹង ២៕

ប្រភព៖ សហព័ន្ធកីឡាបាល់ទាត់កម្ពុជា