ភីអិនអិន ក្រុងពាលីរឿងថ្មី «ដែនស្នេហ៍អាថ៌កំបាំង»
ស្ថានីយទូរទស្សន៍ភីអិនអិន សហការជាមួយផលិតកម្មភូមិពេជ្រភាពយន្ត ចាប់ផ្ដើមក្រុងពាលីចេញថតខ្សែភាព យន្តខ្មែរខ្នាតធំថ្មីមួយទៀតហើយ ដែលមានចំណងជើងថា «ដែនស្នេហ៍អាថ៌កំបាំង »។ ពិធីក្រុងពាលីថតជាផ្លូវការរឿងថ្មីនេះធ្វើឡើងនៅព្រឹកថ្ងៃទី ៤ ខែធ្នូ ឆ្នាំ ២០១៧ វេលាម៉ោង ១០ ព្រឹក នៅស្ថានីយទូរទស្សន៍ភីអិនអិនផ្ទាល់តែម្តង ។ នេះជាខ្សែភាពយន្តថ្មីមួយដែលបង្ហាញពីទស្សនីយភាពប្លែក និង មិនធ្លាប់មានពីមុនមក ដោយសាច់រឿងបែបស្នេហា អាភិនីហារ និង បង្ហាញនូវបែបបទនៃការរស់របស់កុលសម្ព័ន្ធ ។ មិនតែប៉ុណ្ណោះ ឈុតឆាកនីមួយៗបង្កប់ដោយអាថ៌កំបាំង ព្រឺព្រួច លាយនឹងមនោសញ្ចេតនាផ្អែមល្ហែម ច្បាស់ជាមិនធ្វើឱ្យទស្សនិកជនខកបំណងឡើយ ។
ភីអិនអិន គឺជាស្ថានីយទូរទស្សន៍ឈានមុខគេក្នុងឆ្នាំ ២០១៧ ដែលបានបោះទុនវិនិយោគច្រើនសន្ធឹកសន្ធាប់ក្នុងផលិតភាគយន្តខ្មែរ ក្នុងទឹកប្រាក់ខ្ទង់លានដុល្លារអាមេរិក ដើម្បីពង្រឹងនូវគុណភាពភាពយន្តខ្មែរ ហើយភាពយន្តភាគខ្មែរជាច្រើនគឺត្រូវបានគាំទ្រពីសំណាក់ទូរទស្សនិកជនខ្មែរទូទាំងប្រទេស ដូចជា «រឿងមន្តស្នេហ៍ក្រមុំបាយឆា» រឿង «ពស់កេងកង» រឿង «ទុំទាវ» និង រឿង «សុផាត» ជាដើម ។
កញ្ញា ទូច បុប្ផា ប្រធានផ្នែកកម្មវិធីផ្សាយរបស់ភីអិនអិន បានប្រាប់ថា «ក្នុងឆ្នាំ ២០១៧ នេះ យើងបានលើកយកនូវស្នាដៃអ្នកនិពន្ធជំនាន់មុន ដែលជាសាច់រឿងក្នុងស្រុកជាច្រើន មកផលិតជាភាពយន្តភាគទូរទស្សន៍ដើម្បីឱ្យទូរទស្សនិកជនបានទស្សនា ដោយកន្លងមកទស្ស និកជនធ្លាប់តែបានអាចសៀវភៅ រឺលឺតាមរយៈល្ខោនវិទ្យុ តែសម្រាប់រឿង «ដែនស្នេហ៍អាថ៌កំបាំង» គឺជាសាច់រឿងបង្កើតថ្មីដោយផលិតករ និង អ្នកនិពន្ធខ្មែរយើង ហើយរឿងមានការ Set up prop ប្លង់ធំៗជាច្រើន ហើយក្រុមការងារផលិត និង តារាសម្តែងត្រូវសម្រាកនៅក្នុងព្រៃជាច្រើនខែដើម្បីថតរឿងនេះ ។«ដែនស្នេហ៍អាថ៌កំបាំង» គឺគ្រោងនឹងចាក់ផ្សាយក្នុងពាក់កណ្តាលឆ្នាំ ២០១៨» ។
កញ្ញាបន្ថែមថា នាឆ្នាំ ២០១៨ ភីអិនអិន មានគម្រោងនឹងនាំយកនូវស្នាដៃរឿងប្រលោមលោកខ្មែរមួយចំនួនរបស់អ្នកនិពន្ធជំនាន់ក្រោយ មកផលិតជាភាពយន្តភាគទូរទស្សន៍ នេះជាការគាំទ្រ និង លើកទឹកចិត្តដល់អ្នកនិពន្ធរបស់យើង ។ ជារឿយៗ ភីអិនអិន តែងតែខិតខំប្រឹងប្រែងពង្រឹងលើគុណភាព និង ធ្វើឲ្យកាន់តែប្រសើរឡើង ដើម្បីជាការជួយលើកស្ទួយដល់វិស័យភាពយន្តខ្មែរ ក៏ដូចជាការផ្តល់កម្លាំងចិត្តដល់ផលិតករក្នុងស្រុក និង ឆ្លើយតបទៅនឹងសំណូមពររបស់ទស្សនិកជនខ្លួនដែលតែងតែគាំទ្រ ។
គួរបញ្ជាក់ផងដែរថា រឿង «ដែនស្នេហ៍អាថ៌កំបាំង » នេះគឺជាស្នាដៃលើកទីបីរបស់ផលិតករ លោក ពុទ្ធ ព៌ណ ប្រចាំនៅ ភីអិនអិន បន្ទាប់ពីរឿង «ពស់កេងកង» រឿង «សុផាត» (ដែលកំពុងចាក់ផ្សាយ) ។ រឿង «ដែនស្នេហ៌អាថ៌កំបាំង » ចូលរួមសម្ដែងដោយតារាប្រុសរូបសង្ហាលោក ណាខុន កញ្ញា ណាតាយា កញ្ញា ដួង ម៉ានិច និង តារាប្រុសស្រីល្បីឈ្មោះជាច្រើនរូប ។ ចង់ដឹងថាចំណងស្នេហ៍ និង មនោសញ្ចេតនាដ៏អាថ៌កំបាំងរវាងតួអង្គប្រុស និង តួអង្គស្រីដែលរស់នៅក្នុងកុលសម្ព័នផ្សេងគ្នាទៅជាយ៉ាងណា សូមកុំភ្លេចរង់ចាំទស្សនានៅលើកញ្ចក់ទូរទស្សន៍ ភីអិនអិន តែមួយគត់ ៕
តាមដានព័ត៌មានពីរឿងភាគ ភីអិនអិន សូមចូលទៅកាន់៖ www.facebook.com/PNNDramaFanClub
