ភ្ញៀវទេសចរច្រើនកុះករ នាំគ្នាសម្រុកប្រជ្រៀតទៅមើលព្រឹតិ្តការណ៍ថ្ងៃរះចំកំពូលប្រាសាទអង្គរ ឡើងណែន
នៅថ្ងៃទី ២២ ខែកញ្ញា ឆ្នាំ ២០២៣ នេះ អាជ្ញាធរជាតិអប្សរា បានបង្ហោះរូបភាពជាច្រើនសន្លឹកបង្ហាញពីទិដ្ឋភាពភ្ញៀវទេសចរជាតិ និង អន្តរជាតិយ៉ាងច្រើនកុះករ នាំគ្នាចូលរួមទស្សនា និង ផ្តិតយករូបភាព ព្រឹត្តិការណ៍សមរាត្រី (ថ្ងៃរះចំកំពូលប្រាសាទអង្គរវត្ត) នៅទឹកដីខេត្តសៀមរាប ដែលកើតមានឡើងចាប់ពីថ្ងៃទី ២១ ដល់ថ្ងៃទី ២៣ ខែកញ្ញានេះ។
Equinox Angkor Wat គឺជាព្រឹត្តិការណ៍មួយ ដែលកើតឡើងពីរដងក្នុងមួយឆ្នាំ ដោយលើកទី ១ នៅក្នុងខែមីនា និង លើកទី ២ នៅខែកញ្ញា ដោយព្រឹត្តិការណ៍នេះ បានបង្ហាញឱ្យឃើញពីទំនាក់ទំនងគ្នាជាមួយនឹងស្ថាបត្យកម្មរបស់អង្គរវត្តដ៏អស្ចារ្យនៅក្នុងប្រវត្តិសាស្ត្រខ្មែរ ដែលជាហេតុជួយទាក់ទាញភ្ញៀវទេសចរយ៉ាងច្រើនកុះករឱ្យមកទស្សនា។
ទន្ទឹមនឹងនោះដែរ អាជ្ញាធរជាតិអប្សរាបានឱ្យដឹងដែរថា ព្រឹត្តិការណ៍ថ្ងៃរះចំកំពូលកណ្ដាលនៃប្រាសាទអង្គរវត្តនេះ ត្រូវបានអ្នកស្រាវជ្រាវផ្នែកវិទ្យាសាស្ត្រអាជ្ញាធរជាតិអប្សរា ឱ្យឈ្មោះថា ព្រឹត្តិការណ៍សមរាត្រី (Equinox) ដែលជារៀងរាល់ឆ្នាំ ព្រឹត្តិការណ៍សមរាត្រី (Equinox) តែងតែកើតមាន ២ ដងក្នុងមួយឆ្នាំ គឺនៅរដូវប្រាំង (Vernal Equinox) កើតទ្បើងនៅខែមីនា និង សមរាត្រីរដូវវស្សា (Autumnal Equinox) កើតទ្បើងនៅខែកញ្ញា។
គួរឱ្យដឹងដែរថា ព្រឹត្តិការណ៍សមរាត្រីនេះដែរគឺជា វេលាដែលថ្ងៃ និង យប់ មានរយៈពេលស្ទើរតែស្មើគ្នា ហើយក្រៅពីនេះ ខែខ្លះ ពេលថ្ងៃមានរយៈពេលវែងជាងពេលយប់ ហើយខែខ្លះទៀត យប់មានរយៈពេលវែងជាងថ្ងៃ ទៅវិញក៏មានដែរ។ ភាពដ៏អស្ចារ្យនេះ បានកើតឡើងនៅអង្គរវត្ត គឺស្របពេលដែលជាពេលវេលាថ្ងៃ និង យប់មានរយៈពេលស្ទើស្មើគ្នា ហៅថាសមរាត្រី នោះដំណើរផែនដី និង ដំណើរព្រះអាទិត្យ ក៏បានរះទ្បើងចំកំពូលកណ្តាលនៃអង្គរវត្ត៕
រូបភាព ៖ ហ៊ុំ រិទ្ធី/ ហាប់ គឹមអាន/ រដ្ឋ ផល្លីន/ អាជ្ញាធរជាតិអប្សរា
