អគ្គិសនីកម្ពុជា នឹងបញ្ចុះតម្លៃ ចំពោះប្រជាពលរដ្ឋដែលប្រើប្រាស់អគ្គិសនីប្រភេទឧស្សាហកម្ម និង កសិកម្ម

នៅថ្ងៃទី ២០ ខែកញ្ញា ឆ្នាំ ២០២៣ នេះ ក្រសួងរ៉ែ និង ថាមពល បានចេញសេចក្ដីប្រកាសព័ត៌មានស្ដីពី ការបញ្ចុះថ្លៃអគ្គិសនី ចំពោះអ្នកប្រើប្រាស់ប្រភេទឧស្សាហកម្ម និង កសិកម្ម។

យោងតាមសេចក្ដីជូនដំណឹងបានឱ្យដឹងថា ក្នុងគោលដៅជំរុញការពង្រីកផលិតកម្មរោងចក្រ និង សហគ្រាស ផ្នែកឧស្សាហកម្ម និង ផ្នែកកសិកម្ម ដើម្បីបង្កើតការងារ និង ប្រាក់ចំណូលជូនប្រជាពលរដ្ឋ សម្ដេចធិបតី ហ៊ុន ម៉ាណែត បានសម្រេចឱ្យក្រសួងរ៉ែ និង ថាមពល អគ្គិសនីកម្ពុជា និង អាជ្ញាធរអគ្គិសនីកម្ពុជា បញ្ចុះថ្លៃអគ្គិសនី ចំពោះបរិមាណអគ្គិសនី ដែលអ្នកប្រើប្រាស់ប្រភេទឧស្សាហកម្ម និង កសិកម្ម ដែលភ្ជាប់ពីបណ្ដាញតង់ស្យុងមធ្យម និង តង់ស្យុងខ្ពស់ក្នុងក្របខណ្ឌទូទាំងប្រទេស ដែលរួមមានអ្នកប្រើប្រាស់អគ្គិសនីតាមអត្រាថ្លៃមធ្យម អ្នកប្រើប្រាស់អគ្គិសនីតាមពេលវេលា និង អានុភាព ព្រមទាំងអ្នកប្រើប្រាស់អគ្គិសនី ដែលមានដំឡើងប្រព័ន្ធពន្លឺព្រះអាទិត្យ ដែលភ្ជាប់ជាមួយបណ្ដាញជាតិបានប្រើប្រាស់លើសពីមធ្យមភាគប្រចាំខែនៃការប្រើប្រាស់ ៦ ខែចុងក្រោយ ទៅតាមលក្ខខណ្ឌដូចខាងក្រោម ៖

• បញ្ចុះអត្រាថ្លៃចំនួន ១០ ភាគរយ សម្រាប់បរិមាណថាមពល ដែលប្រើប្រាស់លើសមធ្យមភាគប្រចាំខែពីថ្ងៃចន្ទ ដល់ថៃ្ងសៅរ៍ ចន្លោះម៉ោងពី ៧ ព្រឹកដល់ម៉ោង ៩ យប់។

• បញ្ចុះអត្រាថ្លៃចំនួន ២០ ភាគរយ សម្រាប់បរិមាណថាមពល ដែលប្រើប្រាស់លើសមធ្យមភាគប្រចាំខែពីថ្ងៃចន្ទ ដល់ថៃ្ងសៅរ៍ ចន្លោះម៉ោងពី ៩ យប់ដល់ម៉ោង ៧ ព្រឹក និង ២៤ ម៉ោងសម្រាប់ថ្ងៃអាទិត្យ និង ថ្ងៃបុណ្យជាតិ រយៈពេលអនុគ្រោះថ្លៃ ដើម្បីលើកទឹកចិត្តឱ្យបង្កើនការប្រើប្រាស់ខាងលើមានរយៈពេល ៣ ខែចាប់ពីខែតុលា ដល់ខែធ្នូ ឆ្នាំ២០២៣ និង អាចពិនិត្យបន្តតាមរយៈការជូនដំណឹងមុន ៣០ ថ្ងៃ តាមលទ្ធភាពជាក់ស្តែងរបស់អគ្គិសនីកម្ពុជា។

• អតិថិជនអ្នកប្រើប្រាស់អគ្គិសនីប្រភេទឧស្សាហកម្ម និង កសិកម្ម ភ្ជាប់ពីបណ្តាញតង់ស្យុងមធ្យម និង តង់ស្យុងខ្ពស់ ដែលយល់ថាខ្លួនមានលទ្ធភាពបង្កើនការប្រើប្រាស់ និង មានបំណងទទួលបានការអនុគ្រោះថ្ងៃនេះ ត្រូវធ្វើការដាក់ពាក្យស្នើសុំទៅអ្នកផ្គត់ផ្គង់អគ្គិសនីក្នុងតំបន់របស់ខ្លួន។

គួរបញ្ជាក់ដែរថា ក្រសួងបានប្រកាសច្បាស់ៗថា ការផ្តល់ថ្លៃអនុគ្រោះនេះ មិនសំដៅទៅលើស្ថាប័នរដ្ឋ ផ្នែកពាណិជ្ជកម្ម និង លំនៅឋាននោះទេ ដោយអ្នកប្រើប្រាស់ក្នុងជំពូកនេះ កំពុងត្រូវបានអគ្គិសនីកម្ពុជា និង រាជរដ្ឋាភិបាលកម្ពុជា ជួយឧបត្ថម្ភធនរួចហើយ៕