BeyondTheGames នៅថ្ងៃទី ១៩ ខែមេសា ឆ្នាំ ២០២៣ បានបញ្ជាក់ពីការតាំងបង្ហាញបេះដូងច្រើនជាងគេលើពិភពលោក នៅទីតាំងប្រាសាទអង្គរវត្ត ទឹកដីខេត្តសៀមរាប។
BeyondTheGames បានបញ្ជាក់ឱ្យដឹងថា ដើម្បីឆ្លើយតបតាមការសំណូមពររបស់បងប្អូន និង មហាជន ដែលមានបំណងមកទស្សនាការដាក់តាំងបង្ហាញបេះដូងច្រើនជាងគេលើពិភពលោក ជាពិសេសបងប្អូនភ្ញៀវទេសចរនៅទីឆ្ងាយ អាចចូលរួមទស្សនាបានដោយផ្ទាល់ យុទ្ធនាការ BeyondTheGames នឹងបន្តធ្វើការតាំងបង្ហាញបេះដូង នៅប្រាសាទអង្គរវត្ត រហូតដល់ថ្ងៃទី ២៣ ខែមេសា ឆ្នាំ ២០២៣។
សូមរំឭកផងដែរថា នៅថ្ងៃទី ១១ ខែមេសា ឆ្នាំ ២០២៣ ក្រុមការងារ Guinness World Record បានប្រកាសជាផ្លូវការ កម្ពុជាបំបែកឯតទគ្គកម្មជាផ្លូវការ ១ លានបេះដូង ដោយសរុបចំនួនបេះដូងគឺ ៣ ៩១៧ ៨០៥ បេះដូង។ ការប្រកាសជាផ្លូវការនេះ ធ្វើឡើងនៅលើទឹកដីប្រាសាទអង្គរ នៃព្រះរាជាណាចក្រកម្ពុជា ក្រោមការចូលរួមយ៉ាងកុះករពីសំណាក់ភ្ញៀវជាតិអន្តរជាតិ ឈរត្រៀមត្រាមុខបរិវេណអង្គរវត្ត ខណៈឯតទគ្គកម្ម ខាងលើបានប្រកាសក្រោយពីស្ថិតក្រោមការត្រួតពិនិត្យយ៉ាងហ្មត់ចត់ពីសំណាក់ ក្រុមការងារ Guinness World Record៕
