ខេត្តសៀមរាប ជាខេត្តមួយសម្បូរទៅដោយប្រាង្គប្រាសាទបុរាណ ទីតាំងទេសចរណ៍ចម្រុះ និង កន្លែងកម្សាន្តកើតថ្មីជាច្រើន អមដោយអាហារឆ្ងាញ់ៗ។ ថ្ងៃនេះ «ប្រជាប្រិយ» នឹងណែនាំ ៥ កន្លែងនៅខេត្តសៀមរាប ដែលល្អបំផុតសម្រាប់អ្នកនិយមធ្វើដំណើរកម្សាន្ត និង ចូលចិត្តមើល ឬ ថតរូបពេលថ្ងៃលិច ហើយគយគន់ទេសភាពជជែកកម្សាន្តជាមួយមិត្តភក្ដិ និង គូស្នេហ៍។
១. ប្រាសាទភ្នំបាខែង
ប្រាសាទភ្នំបាខែង ត្រូវបានកសាងឡើងនៅចុងសតវត្សរ៍ទី ៩ និង ដើមសតវត្សរ៍ទី ១០ នៅក្នុងរាជព្រះបាទយសោវរ្ម័នទី ១ ឧទ្ទិសដល់ព្រហ្មញ្ញសាសនា ដែលមានទីតាំងស្ថិតនៅលើកំពូលភ្នំធម្មជាតិមួយ និង ជាទីតាំងល្អបំផុតក្នុងការទស្សនាព្រះអាទិត្យហៀបលិច។ ក្រៅពីនោះ យើងក៏អាចមើលឃើញកំពូលរបស់ប្រាសាទអង្គរវត្ត បារាយណ៍ទឹកថ្លា និង ទេសភាពវាលស្រែក្បែរៗនោះផងដែរ។
២. តំបន់ភ្នំក្រោម
ភ្នំក្រោម មានចម្ងាយប្រហែល ១០ គីឡូម៉ែត្រ នៅខាងត្បូងក្រុងសៀមរាប និង ខាងជើងបឹងទន្លេសាប។ នៅលើកំពូលភ្នំមានប្រាសាទមួយក្រុម ដែលបានសាងសង់ឡើងពីថ្មភក់ នៅចុងសតវត្សរ៍ទី ៩ និង ដើម្បីសតវត្សរ៍ទី ១០ ក្នុងរជ្ជកាលព្រះបាទយសោវរ្ម័នទី ១ ដោយទីនេះបានក្លាយជាកន្លែងល្អបំផុត ក្នុងការគយគន់ទិដ្ឋភាពដ៏ស្រស់ស្អាតនៃប្រាសាទបុរាណ និង ទេសភាពវាលស្រែយ៉ាងធំល្វឹងល្វើយនារដូវវស្សា ជាមួយព្រះអាទិត្យហៀបអស្ដង្គត។
៣. ប្រាសាទជ្រុង
ប្រាសាទជ្រុង ជាប្រាសាទតូចមួយ ដែលស្ថិតក្នុងបរិវេណកំពែងខាងក្រៅនៃក្រុងអង្គរធំ នៅត្រង់កន្លែងកាច់ជ្រុងនៃទន្លេអុំ។ ប្រាសាទនេះកសាងនៅចុងសតវត្សរ៍ទី ១២ ដែលជាស្នាព្រះហស្តរបស់ព្រះមហាវីរក្សត្រព្រះបាទជ័យវរ្ម័នទី ៧។ សព្វថ្ងៃប្រាសាទនេះមានការពេញនិយមពីសំណាក់ភ្ញៀវទេសចរ ជាពិសេសអ្នកដែលចូលចិត្តជិះកង់ ពីព្រោះប្រាសាទជ្រុង ជាកន្លែងអាចទស្សនាទេសភាពថ្ងៃលិចដ៏ពិសិដ្ឋ និង ពន្លឺដ៏ស្រទន់នៃព្រះសូរិយាពេញភ្នែក ហើយអាចទស្សនាទិដ្ឋភាពដងទន្លេបុរាណប្របរុក្ខជាតិតូចធំ និង ទូកកម្សាន្ដផងដែរ។
៤. ប្រាសាទនាគព័ន្ធ
ស្ថិតក្នុងតំបន់វង់ធំ ប្រាសាទនាគព័ន្ធ ជាទីតាំងដែលអ្នកទេសចរមិនថាជាតិ ឬ អន្តរជាតិតែងទៅដើម្បីគយគន់សម្រស់ធម្មជាតិដែលនៅជុំវិញប្រាសាទ ក៏ដូចជាមើលថ្ងៃលិចផងដែរ ដោយហេតុនៅជុំវិញនោះសម្បូរដោយទឹក និង ស្រឡះល្អងាយស្រួលក្នុងការថតរូប ជាដើម។
៥. ខ្នងបារាយណ៍
តំបន់ទេសចរណ៍ធម្មជាតិមួយនេះ បាន និង កំពុងទាក់ទាញអ្នកទេសចរឱ្យទៅកម្សាន្តយ៉ាងច្រើនកុះករ។ ខ្នងបារាយណ៍មានទីតាំងស្ថិតនៅ ខាងជើងព្រលានយន្តហោះសៀមរាប ខាងក្រោយវត្តស្វាយរមៀត ហើយអ្នកចង់ទៅកម្សាន្តនៅខ្នងបារាយណ៍ គួរតែទៅនាពេលរសៀលថ្ងៃជ្រេបន្តិច ដើម្បីផ្ដិតយកនូវរូបភាពដ៏ស្រស់ស្អាត ដោយអាចខ្ចប់ម្ហូបអាហារ ភេសជ្ជៈយកទៅអង្គុយញ៉ាំជុំគ្រួសារ មិត្តភក្តិ ឬ មនុស្សជាទីស្រឡាញ់នៅក្បែរមាត់ទឹកអមទៅដោយវាលស្រែខៀវស្រងាត់ អង្គុយចាំគយគន់សម្រស់ថ្ងៃហៀបលិច ជាមួយនឹងខ្យល់ជំនោរបក់តិចៗ៕
