កំពុងថ្វាយបង្គំព្រះស្រាប់តែបាក់រលំព្រះវិហារគ្រាំង មនុស្សធ្លាក់ចូលអណ្ដូងអស់បុណ្យ និង របួសជាង ៥០ នាក់

សារព័ត៌មាន CNA បានចុះផ្សាយថា មកដល់ថ្ងៃទី ៣១ ខែមីនា ឆ្នាំ ២០២៣ នេះ មានមនុស្សចំនួន ៣៥ នាក់ហើយបានស្លាប់ និង ១៦ នាក់ទៀតរងរបួស ដោយសារតែការធ្លាក់ចូលទៅក្នុងអណ្ដូងទឹកមួយនៅឯព្រះវិហារសាសនាហិណ្ឌូមួយកន្លែង ក្នុងប្រទេសឥណ្ឌា កាលពីថ្ងៃទី ៣០ ខែមីនា ឆ្នាំ ២០២៣ កន្លងទៅ ក្រោយពីព្រះវិហារនោះបានបាក់រលំ។

តាមសារព័ត៌មានក៏បានឱ្យដឹងទៀតថា មនុស្ស ២៥ នាក់ បានធ្លាក់ចូលទៅក្នុងអណ្ដូងទឹក។ តាមការបញ្ជាក់ពីលោក Narottam Mishra រដ្ឋមន្ត្រីក្រសួងមហាផ្ទៃបានឱ្យដឹងថា ៖ «យើងបានជួយសង្រ្គោះមនុស្សចំនួន ១៨ នាក់ ហើយប៉ូលិសក៏បានរកឃើញសាកសពចំនួន ៣៥ នាក់ដែរ ខណៈមនុស្សចំនួន ១៦ នាក់ទៀតបានរងរបួស»។

លោក Mishra ក៏បាននិយាយទៀតថា ៖ «ចំពោះឧបទ្ទវហេតុនេះ នឹងមានការស៊ើបអង្កេត ហើយចំពោះក្រុមគ្រួសារជនរងគ្រោះដែលបាត់បង់ជីវិត នឹងត្រូវជូនសំណង»។ ជាមួយគ្នានេះដែរ រូបភាពនៅតាមទូរទស្សន៍ឥណ្ឌា ក៏បានបង្ហាញពីបុគ្គលិកសង្គ្រោះបន្ទាន់ ដែលបានប្រើខ្សែពួរ និង ជណ្ដើរ ដើម្បីទៅសង្គ្រោះអ្នកដែលជាប់ក្នុងអណ្តូងក្នុងរដ្ឋ Madhya Pradesh ។

គួរដឹងដែរថា ព្រះវិហារនានានៅទូទាំងប្រទេសឥណ្ឌា កាលពីថ្ងៃទី ៣០ ខែមីនាកន្លងទៅ គឺពោរពេញទៅដោយ អ្នកកាន់សាសនា ព្រោះជាថ្ងៃបុណ្យ Ram Navami ដែលជាថ្ងៃព្រះរាមប្រសូត៕

ប្រភព ៖ CNA