(វីដេអូ) ស្អាតប្រណីត! វត្តខ្ចាស់នៅបន្ទាយមានជ័យ មានសំណង់ល្អល្អះធំស្កឹមស្កៃយ៉ាងទាក់ទាញ នឹងរៀបចំពិធីបញ្ចុះសីមាឆាប់ៗ
ថ្មីៗនេះមហាជនអ្នកនិយមលេងបណ្ដាញសង្គមហ្វេសប៊ុកបានផ្ទុះការចាប់អារម្មណ៍ជាខ្លាំង ទៅលើសម្រស់ដ៏ស្រស់ត្រកាលនៃវត្តអារាមខ្មែរមួយកន្លែង ដែលស្ថិតនៅក្នុងខេត្តបន្ទាយមានជ័យ។
អារាមមួយកន្លែងនេះត្រូវបានគេស្គាល់ថា «វត្តប្រាសាទស្រះកណ្ដាល» ឬអាចហៅម្យ៉ាងទៀតថា «វត្តខ្ចាស់» មានទីតាំងស្ថិតនៅភូមិខ្ចាស់ ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ ដែលបានចាប់ផ្ដើមកសាងឡើងកាលពីឆ្នាំ ២០១៣ និង ដឹកនាំកសាងដោយ ព្រះមហាធម្មាលង្ការោ ចាន់ សុជន ដែលបានបញ្ចប់ការសិក្សាជោគជ័យថ្នាក់បរិញ្ញាបត្រជាន់ខ្ពស់ផ្នែកទស្សនវិជ្ជានៅប្រទេស ស្រីលង្កា។
អ្វីដែលជាទីចាប់អារម្មណ៍នៃវត្តខ្ចាស់នេះគឺ ក្នុងបរិវេណវត្តគេឃើញមានសំណង់ព្រះវិហារមានរចនាបទខ្មែរយ៉ាងស្កឹមស្កៃ មានរូបបដិមា រូបដំរីមួយគូ រូបនាគ យ៉ាងស្អាតនៅចាំទទួលពុទ្ធបរិស័ទ ដែលបានចូលទៅដល់វត្តនេះ។ លើសពីនេះទៅទៀតក៏មានសួនច្បារមានដាំផ្កាចម្រុះពណ៌ជាច្រើន និង មានសំណង់ចេតិយពណ៌ស ព្រមទាំងពណ៌មាស យ៉ាងល្អស្អាតនៅទីនោះទៀតផង។
មិនតែប៉ុណ្ណោះ ក្នុងបរិវេណវត្តនេះក៏មានព្រះពុទ្ធប្បដិមាអង្គធំកម្ពស់ ៨០ ម៉ែត្រ មានអគារទ្របីជាន់ជាសេនាសនៈសង្ឃ ដែលពុំធ្លាប់មានពីមុននៅកម្ពុជាយើង។ គួរបញ្ជាក់ដែរថា វត្តប្រាសាទស្រះកណ្ដាល ឬ វត្តខ្ចាស់នេះ មិនត្រឹមតែជាវត្តអារាមសក្ការៈបូជាតែប៉ុណ្ណោះទេ ប៉ុន្តែក៏ជារមណីយដ្ឋានទេសចរណ៍ វប្បធម៌មួយកន្លែង ដែលមានប្រជាប្រិយភាពប្រចាំខេត្តបន្ទាយមានជ័យផងដែរ ហើយឆាប់ៗខាងមុខវត្តនេះនឹងរៀបចំពិធីបញ្ចុំសីមាដែលទៀត ដែលពិធីប្រារព្ធឡើងនៅថ្ងៃទី ១ ខែមេសា ឆ្នាំ ២០២៣ ខាងមុខនេះ៕
រូបភាព ដោយ៖ ក្រសួងបរិស្ថាន និង Banteay Meanchey News Youths
