អុញ! សួនសត្វមួយនៅអាមេរិក អាចឱ្យភ្ញៀវដាក់ឈ្មោះឱ្យកន្លាតដូចឈ្មោះសង្សារចាស់របស់ពួកគេ រួចយកវាទៅបោះឱ្យសត្វដទៃស៊ី

សារព័ត៌មាន CNN បានចុះផ្សាយថា សួនសត្វ San Antonio នឹងអនុញ្ញាតឱ្យអ្នកចូលទស្សនាអាចដាក់ឈ្មោះឱ្យសត្វកន្លាតតាមឈ្មោះសង្សារចាស់របស់ពួកគេបាន រួចហើយយកវាទៅបោះឱ្យសត្វដទៃស៊ីជាចំណី។

សួនសត្វ San Antonio បានប្រកាសផ្ដល់ជូននូវឱកាសពិសេសសម្រាប់អ្នកដែលមានបំណងចូលទស្សនាសួនសត្វអាចដាក់ឈ្មោះកន្លាតតាមឈ្មោះសង្សារចាស់របស់ខ្លួនបាននៅថ្ងៃបុណ្យនៃក្ដីស្រឡាញ់ (១៤ កុម្ភៈ) កន្លងមក ហើយកន្លាតមួយក្បាល គឺមានតម្លៃ ១០ ដុល្លារ ហើយបន្ទាប់ពីដាក់ឈ្មោះហើយ អ្នកទស្សនាក៏អាចយកកន្លាតនោះទៅឱ្យសត្វចិញ្ចឹមផ្សេងទៀតស៊ីជាចំណី។

យ៉ាងណាមិញ សួនសត្វ San Antonio បាននិយាយនៅលើគេហទំព័ររបស់ខ្លួនថា កម្មវិធីនេះត្រូវបានធ្វើឡើងដើម្បីរៃអង្គាសប្រាក់ប្រចាំឆ្នាំឈ្មោះ «Cry Me a Cockroach» ដែលនឹងជួយគាំទ្រចក្ខុវិស័យរបស់សួនសត្វនេះ ដើម្បីធានាបាននូវអនាគតសម្រាប់សត្វព្រៃនៅក្នុងរដ្ឋតិចសាស់ និង ជុំវិញពិភពលោក។

ដោយឡែក សម្រាប់អ្នកដែលមិនចាប់អារម្មណ៍លើសត្វកន្លាត ក៏អាចជ្រើសរើស សត្វដទៃផ្សេងបាន ឬ រើសជាបន្លែផ្លែឈើ ដែលមានតម្លៃចាប់ពី ៥ ដុល្លាររហូតដល់ ២៥ ដុល្លារ។ អ្នកដែលបានចូលរួមនឹងទទួលបានកាត Digital Valentine’s Day Card បង្ហាញពីការគាំទ្ររបស់ពួកគេសម្រាប់សួនសត្វនេះ និង អាចផ្ញើកាតនេះបានទៅដល់សង្សារចាស់របស់ពួកគេបាន ដើម្បីប្រាប់ជាដំណឹងទៅសង្សារចាស់ពួកគេថា កន្លាត សត្វកណ្ដុរ ឬ បន្លែផ្លែឈើផ្សេងៗត្រូវបានដាក់ជាចំណីសត្វដទៃហើយ។

ចំណែកឯអ្នកដែលមានសង្សារចាស់ជាមនុស្សចរិតយ៉ាប់ ក្បាលរឹង អាចជ្រើសរើសបង់ប្រាក់ជាពិសេសសម្រាប់ក្នុងតម្លៃ ១៥០ ដុល្លារ ដែលរួមបញ្ចូលដូចជា សារជាវីដេអូផ្ទាល់ខ្លួនទៅកាន់អ្នកទទួលបង្ហាញពីសត្វកន្លាត សត្វកណ្ដុរ ឬ បន្លែផ្លែឈើដែលគេដាក់ឈ្មោះត្រូវបានសត្វដទៃស៊ី។

គួរបញ្ជាក់ដែរថា លោក Cyle Perez ដែលជានាយកផ្នែកទំនាក់ទំនងសាធារណៈរបស់សួនសត្វបានថា ព្រឹត្តិការណ៍ប្រចាំឆ្នាំគឺជា ព្រឹត្តិការណ៍ដ៏ពេញនិយមមួយ ដោយកាលពីឆ្នាំមុនពួកគេបានទទួលប្រាក់បរិច្ចាគច្រើនជាង ៨០០០ ដុល្លារពីរដ្ឋទាំង ៥០ ក្នុងប្រទេស អាមេរិក និង ជាង ៣០ ប្រទេសផ្សេងៗគ្នាទៀត៕

ប្រភព៖ CNN