ខំទិញរបស់របរទៅលេងផ្ទះថ្ងៃចូលឆ្នាំ តែត្រូវឪពុកម្តាយដេញមិនឱ្យចូល ព្រោះនៅលីវយូរពេក

សារព័ត៌មាន Thailand Post English បានចុះផ្សាយនៅថ្ងៃទី ២៤ ខែមករា ឆ្នាំ ២០២៣ នេះថា ស្រ្តីម្នាក់មានអាយុ ៣០ ឆ្នាំ ត្រូវបានឪពុកបណ្ដេញចេញពីផ្ទះ ព្រោះតែនៅលីវយូរពេក។

ស្ត្រីម្នាក់មានអាយុ ៣០ ឆ្នាំ មកពីខេត្ត Shandong បានទៅលេងឪពុកម្ដាយនៅថ្ងៃចូលឆ្នាំថ្មី ដោយមានទាំងអំណោយដូចជា អង្ករ និង ស្ពៃក្តោបជាច្រើនគីឡូ បែរជាត្រូវឪពុកម្ដាយមិនសប្បាយចិត្ត និង ត្រូវបានឪពុកបណ្តេញចេញពីផ្ទះ ព្រោះខឹងកូនស្រីនៅលីវ គ្មានមិត្តប្រុស រហូតដល់អាយុ ៣០ ឆ្នាំ។

មិនត្រឹមតែត្រូវឪពុកបណ្ដេញចេញតែប៉ុណ្ណោះទេ ប្អូនស្រីក៏មិនជួយហើយថែមទាំងបានសើចចំអក និង បានថតវីដេអូឌឺដងឱ្យបងស្រីថា ៖ «ខ្ញុំមិនដឹងទេ ប៉ាមិនពេញចិត្តបងដែលមកម្នាក់ឯង ឬមួយក៏គាត់មិនពេញចិត្តដែលបងយកអំណោយមកតិចពេក»។ យ៉ាងណាមិញ ក្រោយពីរឿងនេះត្រូវបានគេផ្សព្វផ្សាយ អ្នកនិយមលេងអ៊ីនធឺណែតភាគច្រើនបានបញ្ចេញមតិមិនពេញចិត្តជាច្រើនពីរឿងដែលប្អូនស្រីនោះបាននិយាយក្នុងវីដេអូ។

គួរបញ្ជាក់ដែរថា ស្រ្តីរូបនោះបានលើកឡើងដែរថា មូលហេតុដែលឪពុកម្តាយដេញចេញមិនឱ្យចូលផ្ទះនោះ អាចដោយសារឪពុកម្តាយរបស់ខ្លួនមានអារម្មណ៍អាម៉ាស់មុខ ព្រោះកូនស្រីធំហើយ តែនៅមិនទាន់រៀបការ បង្កើតគ្រួសារ និង មានផ្ទះសម្រាប់រស់នៅនោះ៕

ប្រភព៖ Thailand Posts English