នៅព្រឹកថ្ងៃទី ១០ ខែមករា ឆ្នាំ ២០២៣ សារព័ត៌មានបរទេសបានចុះផ្សាយថា ចំនួននៃការឆ្លងកូវីដ ១៩ នៅក្នុងប្រទេសជប៉ុន បានកើនឡើងយ៉ាងខ្លាំង បណ្តាលឱ្យមន្ទីរពេទ្យជាច្រើនទទួលរងសម្ពាធ ព្រោះតែត្រូវព្យាបាលមនុស្សចាស់ ដែលមានជំងឺប្រចាំខ្លួន និង មនុស្សដែលមានភាពស៊ាំនឹងមេរោគក្នុងខ្លួន។
ដោយឡែក សាស្រ្តាចារ្យ Tateda Kazuhiro នៃសាកលវិទ្យាល័យ Toho និង ជាសមាជិកក្រុមប្រឹក្សាភិបាលរដ្ឋាភិបាល បាននិយាយថា ចំនួននៃការឆ្លងប្រចាំថ្ងៃមានលើសពី ៤៥០ ០០០ ករណីកាលពីថ្ងៃទី ៩ កន្លងទៅ ហើយកាលពីសប្តាហ៍មុនមានប្រហែល ២០០ ០០០ ករណីថ្មីក្នុងមួយថ្ងៃ។
លើសពីនេះទៅទៀតលោកបាននិយាយទៀតថា គ្រឿងបរិក្ខារពេទ្យជួរមុខក៏ស្ថិតនៅក្រោមសម្ពាធយ៉ាងខ្លាំង មុនពេលមានការផ្ទុះឡើងជាថ្មីនេះ ដោយអ្នកជំងឺជាច្រើនបានសម្រាកព្យាបាលនៅមន្ទីរពេទ្យ ព្រោះតែជំងឺផ្សេងទៀតដូចជា ជំងឺដាច់សរសៃឈាមខួរក្បាល តែក្រោយមកបានធ្វើតេស្តវិជ្ជមានកូវីដ ១៩ ។
ចំណែកឯ ស្ថិតិរបស់ក្រសួងសុខាភិបាលជប៉ុនបានបង្ហាញរបាយការណ៍ថាគិតត្រឹមថ្ងៃទី ៨ ខែមករា ឆ្នាំ ២០២៣ នេះអ្នកស្លាប់ចំនួន ៣០១ នាក់ ដែលនាំឱ្យចំនួនអ្នកស្លាប់សរុបក្នុងប្រទេស ជប៉ុន បានកើនឡើងដល់ ៦០ ០០០ នាក់ចាប់តាំងពីមានការផ្ទុះឡើងនៃកូវីដ ១៩ ដែលភាគច្រើនជាមនុស្សចាស់។
គួរបញ្ជាក់ដែរថា មូលហេតុនៃការកើនឡើងភ្លាមៗនៃចំនួនអ្នកស្លាប់ដោយសារកូវីដ ១៩ គឺដោយសារអត្រាមនុស្សចាស់ដែលទទួលវ៉ាក់សាំងលើកទី ៣ គឺមានត្រឹមតែ ៦០ ភាគរយ ស្របពេលដែលអាជ្ញាធរកំពុងពង្រឹងសមត្ថភាពប្រព័ន្ធសុខាភិបាលក្នុងការការពារ និង ដាក់ឱ្យនៅដាច់ពីគេ។ លើសពីនេះ រដ្ឋាភិបាលក៏បានជំរុញឱ្យប្រជាពលរដ្ឋ ដែលមានជំងឺកូវីដ ១៩ កម្រិតស្រាលព្យាបាលតាមផ្ទះវិញ៕
ប្រភព៖ Vietnam Post English
