ផ្អើលនៅថៃ! ចាប់បានបុរស IT ម្នាក់ លួចថតវីដេអូក្រោមសំពត់ស្រីៗ មានទាំងតារាស្រីល្បី ៣៩ នាក់ផងយកលក់
កាលពីថ្ងៃទី ៦ ខែធ្នូ ឆ្នាំ ២០២២ កន្លងទៅនេះ ខាងប៉ូលិសប្រឆាំងបទល្មើសបច្ចេកវិទ្យារបស់ថៃ បានបុកសម្រុកទៅចាប់បុរសម្នាក់ដែលជាជនស្មោកគ្រោកបានប្រព្រឹត្តទង្វើមិនសមរម្យ ដោយដើរលួចថតវីដេអូក្រោមសំពត់ស្រីៗ រួចយកទៅលក់យ៉ាងមិនគួរឱ្យជឿ។
តាមព័ត៌មានបានឱ្យដឹងថា បុរសខាងលើនេះ អាយុ ៣១ ឆ្នាំ មានមុខរបជា IT ត្រូវបានគេចាប់ខ្លួននៅខេត្តឈុនបុរី ប្រទេសថៃ ជាមួយនឹងភស្តុតាងដូចជា កុំព្យូទ័រ ២ គ្រឿង External ចំនួន ៤ និង កាមេរ៉ាខ្នាតតូច ១ គ្រឿងទៀត។
ក្រោយការសាកសួរ បុរសរូបនេះបានឱ្យដឹងថា ខ្លួនបានប្រព្រឹត្តទង្វើមួយនេះមកប្រមាណជា ៣ ទៅ ៤ ឆ្នាំទៅហើយ ដោយដំបូងឡើយគេជាអ្នកចូលចិត្តមើលវីដេអូអាសអាភាស ក្រោយមកក៏បានបែកគំនិតទៅចេញថតរូប និង វីដេអូបែបនោះតែម្តង។
ក្នុងការថតនេះ ខ្លួនមើលយកតែស្រីៗស្លៀកសំពត់ខ្លីលើជង្គង់ ដែលដើរមិនប្រយ័ត្នខ្លួននៅតាមទីសាធារណៈ ដោយបានបន្លំៗដើរទៅជិតគេ រួចធ្វើជាឱនចងខ្សែស្បែកជើង ហើយក៏ឆ្លៀតយកទូរសព្ទទៅថតក្រោមសំពត់គេ។ លើសពីនេះទៅទៀត ឃ្លីបវីដេអូទាំងនេះ ខ្លួនក៏បានយកទៅចែកចាយលក់ទៅឱ្យក្រុមមួយក្នុងបណ្តាញសង្គម ដែលមានសមាជិកប្រមាណ ៣០ ទៅ ៤០ នាក់ទៀតផង ដោយក្នុងនោះ ៣០ វីដេអូ គឺតម្លៃ ១០០០ បាត ដែលស្មើនឹងប្រហែល ២៥ ដុល្លារ។
អ្វីដែលគួរឱ្យភ្ញាក់ផ្អើលនោះ ក្នុងចំណោមឃ្លីប ២៥៩ ឃ្លីបដែលគេប្រមូលបាន គេក៏ឃើញមានតារាស្រីៗល្បីៗក្នុងវិស័យសិល្បៈចំនួន ៣៩ នាក់ទៀតផង ដែលពួកគេដើរទៅតាមកម្មវិធីផ្សេងៗ ហើយត្រូវបានគេថតបាន។ យ៉ាងណាមិញ បុរសរូបនេះបានអះអាងថា ខ្លួនមិនបានថតវីដេអូរបស់តារាៗទាំងនេះនោះទេ គឺគេបានដោះដូរពីក្រុមផ្សេងៗនៅក្នុងបណ្តាញសង្គមប៉ុណ្ណោះ៕