ទោះឯកភាពបញ្ចប់សំណងរដ្ឋប្បវេណីត្រឹម ២៥០០ ដុល្លារ តែករណីនេះនៅជាប់បណ្តឹងអាជ្ញា កំពុងសាងសំណុំរឿងចាត់ការតាមច្បាប់

កាលពីថ្ងៃចន្ទ ទី ០៥ ខែធ្នូ ឆ្នាំ ២០២២ វេលាម៉ោង ០២ និង ១០ នាទី កន្លងទៅ មានករណីគ្រោះថ្នាក់ចរាចរណ៍ ត្រង់ចំណុចមុខបង្គោលភ្លើងទី ៤ ខាងកើត លើស្ពានជ្រោយចង្វារចាស់ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ដោយសារអ្នកបើកបររថយន្ត បើកបរលឿនខ្វះការប្រុងប្រយ័ត្ន និង បើកបរស្ថិតក្នុងស្ថានភាពស្រវឹងមានអត្រាជាតិអាល់កុល០.៥៣Mg/L និង ត្រូវបានធ្វើការផាកពិន័យ​ចំនួន​ ២ លានរៀល​។

ចំពោះករណីនេះ ខាងស្នងការបានឱ្យដឹងថា ភាគីទាំងអស់បានឯកភាពគ្នាសុំបញ្ចប់សំណងរដ្ឋប្បវេណីចំនួន​ ២៥០០ ដុល្លារ ដោយមិនមានការបង្ខិតបង្ខំ​ នៅការិយាល័យនគរបាលចរាចរណ៍ផ្លូវគោក កាលពីថ្ងៃទី ៥ ខែធ្នូ ឆ្នាំ ២០២២ រួចរាល់ហើយ​។

ទោះបីជាបែបនេះក្ដី ស្នងការបានបញ្ជាក់យ៉ាងច្បាស់ថា ទោះបីជាមានការបញ្ចប់សំណងរដ្ឋប្បវេណីយ៉ាងណាក៏ដោយ ប៉ុន្តែករណីគ្រោះថ្នាក់នេះនៅជាប់បណ្តឹងអាជ្ញា​ ហើយកម្លាំងជំនាញកំពុងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្ត​តាមនីតិវិធីច្បាប់។

គួរឱ្យដឹងផងដែរថា ភាគីរថយន្ត ជាជនបង្កបើករថយន្តម៉ាក LEXUS NX200t ពណ៌ស ពាក់ផ្លាកលេខ ភ្នំពេញ 2BB-9989 បើកបរដោយឈ្មោះ សោម ណូរីទីឃា ភេទប្រុស អាយុ ១៩ ឆ្នាំ មានទីលំនៅផ្ទះលេខ ៥៣ ផ្លូវកែវចិន្តា ភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ឃាត់ខ្លួនកាលពីថ្ងៃ ០៥​ ខែធ្នូ​ ឆ្នាំ ២០២២​។

ឯភាគីម៉ូតូ ជាជនរងគ្រោះ ជិះម៉ូតូម៉ាក HONDA SCOOPY ពណ៌ស ពាក់ផ្លាកលេខ កណ្តាល 1B-9978 បើកបរដោយឈ្មោះ ហុង រត្នថា ហៅស្វិត ភេទប្រុស អាយុ ៣៣ ឆ្នាំ មុខរបររើសអេតចាយ រងរបួស ធ្ងន់សម្រាកព្យាបាលនៅមន្ទីរពេទ្យមិត្តភាពកម្ពុជា-ចិនព្រះកុសុមៈ រួមដំណើរជាមួយ មានគ្នា ០២ នាក់ទី១-ឈ្មោះ មុច សុខឡេង ភេទប្រុស អាយុ ៦០ ថ្ងៃ (រងរបួសធ្ងន់កំពុងសម្រាកព្យាបាលនៅមន្ទីរពេទ្យគន្ធបុប្ផា) និង ទី២-ឈ្មោះ មុច ស្រីល័ក្ខ ភេទស្រី អាយុ៣១ឆ្នាំ មុខរបរ រើសអេតចាយ (រងរបួសធ្ងន់សម្រាកព្យាបាលនៅគ្លីនិកពន្លឺ) អ្នកទាំងបីស្នាក់នៅផ្ទះជួលលេខ ២២៥ ផ្លូវលេខ ៨៦ ភូមិ ២២ សង្កាត់ស្រះចក ខណ្ឌដូនពេញ រាជធានីភ្នំពេញ៕