ប្រទេសចិន ប្រកាសរកឃើញករណីឆ្លងជំងឺកូវីដ-១៩ កើនឡើងលើសលប់រហូតដល់ជាង ៤ ម៉ឺនករណីថ្មី ដោយក្នុងនោះជាង ៣៦ ០០០ ករណី មិនមានចេញរោគសញ្ញា។
បើតាមគណៈកម្មការសុខភាពជាតិប្រចាំប្រទេសចិន បានឱ្យដឹងនៅថ្ងៃទី ២៨ ខែវិច្ឆិកា ឆ្នាំ ២០២២ នេះថា ប្រទេសខ្លួន បានរកឃើញករណីឆ្លងកូវីដ-១៩ ថ្មីចំនួន ៤០ ៣៤៧ នាក់ ក្នុងរយៈពេលត្រឹម ២៤ ម៉ោងមកនេះ ដោយក្នុងនោះចំនួន ៣ ៨២២ ករណីជាករណីចេញរោគសញ្ញា និង ចំនួន ៣៦ ៥២៥ ករណី មិនមានចេញរោគសញ្ញា។ ការកើនឡើងនៃករណីឆ្លងដ៏គំហុកនេះ គឺមិនធ្លាប់កើតមាននៅក្នុងប្រទេសចិនមកឡើយ ចាប់តាំងពីការផ្ទុះជំងឺរាតត្បាតជាសកលនេះមក។
គួរឱ្យដឹងថា ទីក្រុងធំៗនៅចិនដូចជា ក្រុង Guangzhou និង Chongqing ជាដើម ដែលមានករណីផ្ទុះឆ្លងរាប់ពាន់នាក់ បច្ចុប្បន្នកំពុងដែលស្វិតស្វាញរកដំណោះស្រាយ ដើម្បីទប់ស្កាត់ការរាលដាលឆ្លងជំងឺកូវីដ-១៩ នេះ។ យ៉ាងណាមិញ ការផ្ទុះឆ្លងកូវីដ-១៩ ឡើងវិញនៅប្រទេសចិននេះ ក៏បានរាលដាលដល់ទីក្រុងដទៃៗផ្សេងទៀតផងដែរ។
ជាក់ស្ដែង ដូចជាទីក្រុងប៉េកាំង កាលពីថ្ងៃទី ២៧ ខែវិច្ឆិកា កន្លងទៅ រកឃើញករណីឆ្លងកូវីដចំនួន ៣ ៨៨៨ ករណី ដោយក្នុងនោះចំនួន ៨៤០ ករណី ជាករណីចេញរោគសញ្ញា និង ៣ ០៤៨ ករណីទៀត មិនមានចេញរោគសញ្ញា។
គួរបញ្ជាក់ផងដែរថា ប្រទេសចិនកន្លងទៅ បានប្រើប្រាស់យុទ្ធសាស្ត្រ «Zero Covid» ដោយមានការពង្រឹងលើការតេស្តទ្រង់ទ្រាយធំ ការតាមដាន ការដាក់ឱ្យធ្វើចត្តាឡីស័កចំពោះជនដែលសង្ស័យ ក៏ដូចជាការបិទខ្ទប់នានា ដើម្បីទប់ស្កាត់ការរាលដាលឆ្លងនៃជំងឺនេះ។ ទោះជាយ៉ាងណា មកទល់ពេលនេះ យុទ្ធសាស្ត្រមួយនេះគឺមិនទទួលបានជោគជ័យក្នុងការទប់ស្កាត់ការរាលដាលឆ្លងនោះឡើយ៕
