ថ្ងៃកំណើតរបស់ខ្លួន លែងពួយចូលដេកក្នុងមឈូស និង ឱ្យភ្ញៀវចូលរួម ស្លៀកខ្មៅហើយនិយាយពាក្យ រីករាយថ្ងៃស្លាប់
ជាធម្មតាក្នុងថ្ងៃកំណើត មនុស្សម្នាក់ៗតែងតែរកនឹកធ្វើពិធីខួបកំណើតរបស់ខ្លួន ជួបជុំញាតិមិត្ត មានការតុបតែងអ្វីៗយ៉ាងស្រស់ស្អាត ដើម្បីជាសិរីសួស្តីក្នុងការកើនអាយុមួយឆ្នាំទៀត។
យ៉ាងណាមិញ បើក្រឡេកមកមើលខួបកំណើតរបស់បុរសម្នាក់នេះវិញ ហាក់ប្លែកខុសពីពិធីទូទៅតែម្តង ព្រោះលេងសុទ្ធតែតុបតែងធ្វើដូចពិធីបុណ្យសព ឃើញហើយហួសចិត្ត តែក៏ប្លែកភ្នែកម្យ៉ាងដែរ។ ក្នុងនោះ បុរសជាជនជាតិថៃរូបនេះ បានហៅពិធីខួបកំណើតរបស់ខ្លួនថា «HAPPY DEATH DAY» ដែលមានន័យថា «រីករាយថ្ងៃស្លាប់» ដោយបំណងក្នុងការធ្វើពិធីប្លែកបែបនេះ គឺចង់ឱ្យអ្នកដទៃដឹងថា ការស្លាប់នេះ គឺវាបាននៅជាមួយយើងតាំងពីកើតមកម្ល៉េះ។
គេចង់ឱ្យដឹងថាទៀតថា កុំឱ្យខ្លាចសេចក្តីស្លាប់ ត្រូវព្យាយាមប្រើជីវិតឱ្យសតិ និងប្រើប្រាស់ពេលវេលាបច្ចុប្បន្នឱ្យមានតម្លៃជាទីបំផុត មិនថាជាមួយខ្លួនឯង ឬក៏ជាមួយមនុស្សជាទីស្រឡាញ់នោះទេ ម្យ៉ាងយើងមិនអាចដឹងឡើយ ថានឹងត្រូវស្លាប់នៅថ្ងៃណានោះ។
ដោយឡែក បើមើលមកក្នុងពិធីវិញ អ្វីៗគ្រប់យ៉ាងត្រូវបានតុបតែងទៅដោយពណ៌ខ្មៅស្ទើរតែទាំងអស់ ព្រមទាំងមានគ្រឿងប្រដាប់ប្រដា កំប៉ុងធូបទៀន ដូចជានៅក្នុងបុណ្យសពដូច្នោះឯង សូម្បីតែអ្នកចូលរួមក៏ស្លៀកពាក់សុទ្ធតែខ្មៅដែរ។ អ្វីដែលគួរឱ្យចាប់អារម្មណ៍នោះ គឺម្ចាស់ខួបផ្ទាល់ ថែមទាំងបានចូលទៅដេកនៅក្នុងមឈូស សើចស្ញេញថតរូបសប្បាយរីករាយយ៉ាងទំនងទៀតផង។ យ៉ាងណាមិញ ចំណែកមហាជនឃើញហើយ ក៏គិតថាជាគំនិតល្អមួយដែរ ព្រោះជួយដាស់តឿនរំឮកឱ្យមនុស្សឱ្យមានសតិ និង ប្រើជីវិតដោយមិនប្រមាថ៕
