ម្ចាស់រថយន្ត បើករេចុះឡើងពេញផ្លូវល្បឿនលឿន ត្រូវសមត្ថកិច្ចកោះហៅផាកពិន័យតាមច្បាប់ហើយ

តាមរយៈក្រសួងសាធារណការ និងដឹកជញ្ជូន នៅព្រឹកថ្ងៃទី​ ៣១ ខែតុលា ឆ្នាំ ២០២២ នេះ បានបញ្ជាក់ឱ្យបានដឹងថា ម្ចាស់រថយន្ត ដែលបើករេចុះរេឡើងពេញផ្លូវល្បឿនលឿន ត្រូវបានសមត្ថកិច្ចកោះហៅមកធ្វើការផាកពិន័យ ដកពិន្ទុ អប់រំណែនាំ និងចុះកិច្ចសន្យាហើយ។

ទន្ទឹមនោះ បើយោងតាមសេចក្តីរាយការណ៍របស់កងកម្លាំងសមត្ថកិច្ច នៃក្រុមប្រតិបត្តិការនគរបាលចរាចរណ៍ ផ្លូវល្បឿនលឿនភ្នំពេញ-ក្រុងព្រះសីហនុ បានឱ្យដឹងថា ករណីម្ចាស់រថយន្តម៉ាក Toyota Prius ដែលបានបើកបរប្តូរគន្លងទៅមក រេចុះរេឡើងពេញផ្លូវ (កៀរ) កាលពីថ្ងៃទី ២៧ ខែតុលា ឆ្នាំ ២០២២ កន្លងទៅ ត្រូវបានកំណត់អត្តសញ្ញាណ និង កោះហៅមកធ្វើការផាកពិន័យ ដកពិន្ទុពីបណ្ណបើកបរ អប់រំណែនាំ និង ចុះកិច្ចសន្យារួចរាល់ហើយ។

បុរសជាអ្នកបើកបរផ្ទុយពីសេចក្តីណែនាំ និង ច្បាប់ចរាចរណ៍រូបនោះ ត្រូវបានផាកពិន័យ និងដកពិន្ទុពីបណ្ណបើកបរចំនួន ០៤ ពិន្ទុ លើ ០២ ករណី រួមមាន៖

១. បើកបរប្តូរគន្លងទៅមក រេចុះរេឡើងពេញផ្លូវ

២. បណ្ណបើកបរផុតសុពលភាព។

ជុំវិញរឿងរ៉ាវខាងលើ ក្រសួងសាធារណការ និង ដឹកជញ្ជូន សូមធ្វើការក្រើនរំឭកជាថ្មីម្តងទៀត ចំពោះអ្នកបើកបរយានយន្តគ្រប់រូប មិនថាលើផ្លូវល្បឿនលឿន ឬផ្លូវប្រភេទណាឡើយ ត្រូវតែគោរពច្បាប់ចរាចរណ៍ផ្លូវគោក និងគោលការណ៍សុវត្ថិភាពក្នុងការបើកបរ ឱ្យបានម៉ឺងម៉ាត់ជាទីបំផុត ដើម្បីជៀសវាងគ្រោះថ្នាក់ចរាចរណ៍ និងទទួលបានសុវត្ថិភាពក្នុងការធ្វើដំណើរទាំងអស់គ្នា៕