តៃប៉ិ ត្រៀមត្រង់សេជាង ៥៧០០ កន្លែងសម្រាប់ពលរដ្ឋ ការពារករណីមានការវាយលុកពីលើអាកាស
រដ្ឋាភិបាលក្រុងតៃប៉ិ បានប្រកាសថា ពួកគេបានត្រៀមត្រង់សេប្រមាណ ៥ ៧៧១ កន្លែង ក្នុងករណីមានការវាយឆ្មក់តាមផ្លូវអាកាស រួមទាំងជំរុញឱ្យពលរដ្ឋខ្លួន ធ្វើការទាញយកកម្មវិធីលើទូរស័ព្ទមួយ ដើម្បីដឹងពីទីតាំងទាំងនោះ។
បើតាមអ្នកនាំពាក្យផ្នែករដ្ឋបាលសំណង់អគារក្រុងតៃប៉ិ បានឱ្យដឹងនៅថ្ងៃទី ០៤ ខែសីហា ឆ្នាំ ២០២២ កន្លងទៅថា ត្រង់សេទាំងនោះ អាចឱ្យពលរដ្ឋស្នាក់នៅប្រមាណ ១២.៨៧ លាននាក់ ដោយត្រង់សេចំនួន ១ ៤១៧ កន្លែង មានទីតាំងស្ថិតនៅក្នុងអគារសាធារណៈ សាលារៀន ផ្សារទំនើប និង ចំណតយានយន្ត ខណៈចំនួន ៤ ៣៥៤ កន្លែងទៀត គឺធ្វើឡើងក្នុងអគារឯកជន។
តាមសម្ដីអ្នកនាំពាក្យដដែលបានឱ្យដឹងទៀតថា ក្នុងករណីទីក្រុងធ្វើសមយុទ្ធតាមផ្លូវអាកាស ឬ ក៏មានការវាយប្រហារគ្នាពិតៗកើតមានឡើង នោះត្រង់សេទាំងនោះ នឹងបើកឱ្យពលរដ្ឋទាំងអស់ភៀសខ្លួនចូលជ្រកកោននៅទីនោះ។
គួរឱ្យដឹងថា សេចក្ដីប្រកាសនេះដែរ គឺបានធ្វើឡើងដោយក្រុងតៃប៉ិ ក្រោយប្រទេសចិន បានចាប់ផ្ដើមសមយុទ្ធរយៈពេល ៤ ថ្ងៃ ក្នុងតំបន់ចំនួន ៦ ជុំវិញកោះតៃវ៉ាន់។ សមយុទ្ធនោះដែរ គឺចាប់អនុវត្តឡើង ក្រោយលោកស្រី ប្រធានសភាអាមេរិក Nancy Pelosi បញ្ចប់ដំណើរទស្សនកិច្ចរបស់លោកស្រីក្នុងដែនដីកោះមួយនេះ៕
