ត្រៀមៗ! រូបសំណាកថ្មីនៅកំពង់សោម ដំឡើងរួចរាល់ហើយ អភិបាលខេត្តឡើងដាក់ព្រះនេត្រដោយផ្ទាល់

រូបសំណាកព្រះស្កន្ទ គង់លើក្ងោក ត្រូវបានគេដឹងថាជារូបសំណាកទី ៤ បន្ទាប់ពីរូបសំណាកធំៗ ៣ ផ្សេងទៀត ដែលបានសាងសង់រួចរាល់ ព្រមទាំងដាក់ឱ្យដំណើរការនៅលើភូមិសាស្ត្រទឹកដីខេត្តព្រះសីហនុ ទាក់ទាញភ្ញៀវទេសចរណ៍យ៉ាងច្រើនកុះករឱ្យចូលទស្សនា និង ផ្តិតយករូបភាពអនុស្សាវរីយ៍។

ទន្ទឹមទៅនឹងការរៀបចំនូវរូបសំណាកព្រះស្កន្ទនេះ តាមរយៈរដ្ឋបាលខេត្តព្រះសីហនុ នៅថ្ងៃទី ០១ ខែកក្កដា ឆ្នាំ ២០២២ នេះ បានបញ្ជាក់ពីសកម្មភាពឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ និង ឯកឧត្តម យស់ ឆោមណារ៉ាឌី អនុរដ្ឋលេខាធិការក្រសួងរៀបចំដែនដីនគរូបនីយកម្ម និង សំណង់ អញ្ជើញដាក់ព្រះនេត្រ រូបសំណាកព្រះស្កន្ទគង់លើក្ងោក ស្ថិតនៅចំណុចប្រសព្វវិថី ២ ធ្នូ និង វិថីសម្តេចតេជោ ស្ថិតនៅសង្កាត់លេខ ៤ ក្រុងព្រះសីហនុ ក្រោយបានលើកដាក់លើបល្ល័ង្ករួចរាល់។

គួរឱ្យដឹងផងដែរថា រូបសំណាកព្រះស្កន្ទគង់លើក្ងោក ធ្វើពីស្ពាន់ទម្ងន់ ១៥ តោន ព្រះនេត្រធ្វើពីត្បូងនិល ព្រះហស្ថស្តាំកាន់ត្រីសូរ ព្រះហស្ថឆ្វេងកាន់ឈូក មាន​កម្ពស់​សរុបប្រមាណ ១៤ ម៉ែត្រ ក្នុងនោះរូបសំណាកព្រះស្កន្ទ មានកម្ពស់ ៧ ម៉ែត្រ និង បល្ល័ង្កកម្ពស់ ៧ ម៉ែត្រ៕

ប្រភព ៖ រដ្ឋបាលខេត្តព្រះសីហនុ