(វីដេអូ) អត់ពាក់មួកសុវត្ថិភាព ហើយដកខ្សែក្រវ៉ាត់វាយសមត្ថកិច្ចទៀត ឥលូវកុន-កធំ ព្រោះប្រឈមទោសទាំងនេះ

កាលពីរសៀលថ្ងៃទី ២៧ ខែមិថុនា ឆ្នាំ ២០២២ កន្លងទៅ មានបុរសម្នាក់ឈ្មោះ ប៊ូ សុខមាន មុខរបរកម្មករសំណង់ ជិះម៉ូតូម៉ាកហុងដាសេ ១២៥ បានបើកបរល្មើសច្បាប់ចរាចរណ៍ ដោយមិនពាក់មួកសុវត្ថិភាពនៅពេលបើកបរ។

នៅពេលសមត្ថកិច្ចធ្វើការឃាត់ខ្លួន ដើម្បីធ្វើការណែនាំអប់រំ បុរសខាងលើបែរជាមិនស្តាប់តាមការណែនាំរបស់សមត្ថកិច្ច ថែមទាំងជេរប្រមាថមើលងាយ​ និង យកខ្សែក្រវ៉ាត់ វាយចំមកលើសមត្ថកិច្ចថែមទៀតផង។

តាមរយៈសកម្មភាពប្រើអំពើហិង្សាមកលើសមត្ថកិច្ចដូច្នេះ មន្ត្រីនៅគោលដៅអនុវត្តច្បាប់ ក៏បានធ្វើការចាប់ឃាត់ខ្លួនបុរសខាងលើ ដើម្បីយកមកធ្វើការសួរនាំនៅការិយាល័យចរាចរណ៍ នៃស្នងការដ្ឋាននគរបាលរាជធានីភ្នំពេញ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការបន្តតាមនីតិវិធីច្បាប់។

ក្នុងនោះ ខាងស្នងការដ្ឋាននគរបាលរាជធានីភ្នំពេញ បានបញ្ជាក់ផងដែរថា ករណីបុរសខាងលើ នឹងត្រូវអនុវត្តដោយយោងតាមក្រមព្រហ្មទណ្ឌនៃព្រះរាជាណាចក្រកម្ពុជា ត្រង់មាត្រា ៥០៣ បទប្រឆាំងនឹងអ្នករាជការសាធារណ: មាត្រា ២១៧ បទហិង្សាដោយចេតនា និង មាត្រា ៨០ ច្បាប់ស្តីពីចរាចរណ៍ផ្លូវគោក៕

សូមទស្សនាវីដេអូនៅខាងក្រោម ៖