រុស្ស៊ី ព្រមានពីការផ្ទុះសង្គ្រាមលោកលើកទី ៣ ប្រសិនបើ NATO វាយប្រហារ Crimea
អនុប្រធានក្រុមប្រឹក្សាសន្តិសុខរបស់រុស្ស៊ី លោក Dmitry Medvedev បានដាក់ការព្រមានថា សមាជិក NATO ណាដែលប្រកាសសង្គ្រាមជាមួយរុស្ស៊ី ហើយធ្វើការវាយប្រហារលើតំបន់ Crimea នោះ នឹងជាអ្នកនាំឱ្យកើតមានសង្គ្រាមលោកលើកទី ៣ ហើយ។
ថ្លែងក្នុងកិច្ចសម្ភាសកាលពីថ្ងៃទី ២៧ ខែមិថុនា ឆ្នាំ ២០២២ កន្លងទៅ លោក Medvedev បាននិយាយថា៖ «ចំពោះយើង Crimea គឺជាផ្នែកមួយរបស់រុស្ស៊ី និងនៅតែជារបស់រុស្ស៊ីជារៀងរហូត។ នរណាដែលប៉ុនប៉ងចង់ឈ្លានពានតំបន់ Crimea គឺដូចជាការប្រកាសសង្គ្រាមជាមួយប្រទេសយើងដូច្នោះដែរ»។
អនុប្រធានក្រុមប្រឹក្សាសន្តិសុខរូបនេះ បានសង្កត់ធ្ងន់ទៀតថា ៖«ប្រសិនបើការវាយប្រហារនោះ ដឹកនាំដោយសមាជិក NATO នោះមានន័យថានឹងបង្កជម្លោះសម្រាប់សម្ពន្ធភាពអាត្លង់ទិចខាងជើងទាំងមូល ដែលនឹងបង្កឱ្យទៅជាសង្គ្រាមលោកលើកទី ៣ ហើយវានឹងក្លាយទៅជាមហន្តរាយទាំងស្រុង»។
គួរឱ្យដឹងដែរថា ការព្រមានរបស់លោក Medvedev បានប្រកាសឡើងត្រឹមរយៈពេលមួយថ្ងៃក្រោយមន្ត្រីប្រចាំតំបន់ Crimea និយាថា កងទាហានអ៊ុយក្រែន បានឆ្មក់ចូលកន្លែងយកប្រេង Tavrida ដោយក្នុងនោះគេរកឃើញមានស្នាមគ្រាប់កាំភ្លើងទម្លុះកន្លែងចុះឧទ្ធម្ភាគចក្រ ប៉ុន្តែមិនមានបង្កជារបួសស្នាមដល់អ្នកនៅទីនោះឡើយ៕
ប្រភព៖ Reuters