ឆ្លៀតបានក៏ល្អ! នៅពោធិ៍សាត់ មានកន្លែងបោះតង់អាំងភ្លើង អាចមើលឃើញទេសភាព កោះតូចៗ ជាប់ផ្ទៃសមុទ្រនៅថៃ
ស្ថិតក្នុងភូមិឯកភាព ឃុំថ្មដា ស្រុកវាលវែង មានចម្ងាយប្រមាណ ១៥៧ គីឡូម៉ែត្រ ពីទីរួមខេត្តពោធិ៍សាត់ ភ្នំព្រះ ឬ ខ្នងព្រះ គឺជាទីតាំងបោះជំរុំលើកំពូលភ្នំ ដែលអាចអង្គុយគយគន់ទេសភាព ថ្ងៃរះប៉ប្រះព្រៃភ្នំ និង ថ្ងៃហៀបលិច ចាំងលើផ្ទៃទឹកសមុទ្រ ព្រមទាំងអាចមើលឃើញកោះតូចៗ ជាប់នឹងផ្ទៃសមុទ្រ (ខេត្តត្រាត ប្រទេសថៃ) គួរជាទីមនោរម្យ និង ដ៏សែនស្រស់ស្អាត។
ក្រៅពីការគយគន់ទេសភាពខ្នងភ្នំខាងលើ ប្រិយមិត្តក៏អាចមើលឃើញផ្ទាំងទស្សនីយភាព នៃជួរភ្នំជាច្រើនតម្រៀបគ្នាជាជាន់ថ្នាក់ ព្រមទាំងជ្រោះជ្រលងដងអូរ បង្កើតបានទេសភាពយ៉ាងស្រស់បំព្រង គួរឱ្យគយគន់មិនចេះជិនណាយ បូករួមខ្យល់ជំនោរបរិសុទ្ធ បក់បោករំភើយៗ អមទៅដោយស្បៃពពករសាត់ជុំវិញខ្លួន យ៉ាងត្រជាក់ត្រជុំ។
នៅពេលរាត្រីវិញ អាកាសធាតុត្រជាក់ខ្លាំង តម្រូវឱ្យភ្ញៀវទេសចរ បោះតង់ មានអាំងភ្លើងកម្ដៅ មានពូកខ្យល់ សម្លៀកបំពាក់ក្រាស់ៗ ស្រោមដៃ ស្រោមជើង ភួយ និង មួក ជាដើម។
គួរឱ្យដឹងផងដែរថា ភ្នំនេះមានរយ:កម្ពស់ ១៥០០ ម៉ែត្រ ធៀបនឹងនីវ៉ូទឹកសមុទ្រ និង ប្រើរយៈពេលធ្វើដំណើរ (ថ្មើជើង) គិតជាមធ្យម ៦ ម៉ោង (១ យប់ ២ ថ្ងៃ) នឹងមានចម្ងាយផ្លូវប្រមាណ ៧ គីឡូម៉ែត្រ ទើបដល់កំពូលភ្នំ។ ចំពោះស្ថានភាពផ្លូវឡើងភ្នំវិញ គឺត្រូវដើរកាត់តាមព្រៃស្រោង ស្តើង ក្រាស់ ចំណោតទាប មធ្យម ខ្ពស់ ឆ្លងកាត់ជ្រោះ ជ្រលងដងអូរ ដោយត្រូវតោងខ្សែវល្លិ៍ និង ដើមឈើ ដែលក្នុងនោះ ក៏មានផ្ទាំងថ្មធំៗ និង រុក្ខជាតិ តូច ធំពណ៌បៃតងស្រស់ ប្រកបទៅដោយភាពទាក់ទាញយ៉ាងខ្លាំង៕
ប្រភព ៖ Pursat Provincial Hall