ស្ថិតនៅចម្ងាយប្រមាណ ១៨៤ គីឡូម៉ែត្រ ពីរាជធានីភ្នំពេញ ខេត្តពោធិ៍សាត់ ត្រូវបានគេស្គាល់ថា ជាទឹកដីដ៏សែនមនោរម្យដែលមានភ្នំខ្ពស់ៗ បូករួមផ្លូវកាច់កោងវែងអន្លាយ ស្របរុក្ខជាតិបៃតងដុះតាមជួរភ្នំ និង ដងផ្លូវ ស័ក្តិសមបំផុត សម្រាប់ការធ្វើដំណើរកម្សាន្ត ស្រូបយកខ្យល់អាកាស បែបធម្មជាតិបរិសុទ្ធ។
ថ្ងៃនេះផងដែរ «ប្រជាប្រិយ» សូមណែនាំប្រិយមិត្ត មកស្គាល់ទីតាំងលម្ហែជាប់ជើងភ្នំមួយកន្លែង ជាប្រភេទបែបរីសត ដែលមានទេសភាពស្រស់ត្រកាល ស្ថិតនៅជាប់ជើងភ្នំ មានប្លង់ថតរូបស្អាតៗជាច្រើន ធានាថាបានទៅទស្សនាលេងកម្សាន្តហើយ មិនស្ដាយក្រោយឡើយ ដែលនៅទីនោះមានឈ្មោះថា «ថ្មដាផារ៉ាដាយរីសត – Thmorda Paradise Resort»។
ស្ថិតនៅភូមិឯកភាព ឃុំថ្មដា ស្រុកវាលវែង ខេត្តពោធិ៍សាត់ ថ្មដាផារ៉ាដាយរីសត – Thmorda Paradise Resort បាននឹងកំពុងជាទីចាប់អារម្មណ៍សម្រាប់ភ្ញៀវទេសចរគ្រប់មជ្ឈដ្ឋាន ដោយសារតែនៅទីនោះ មានទីធ្លាធំទូលាយខ្លាំង ស្ថិតនៅជាប់ជើងភ្នំ ប្រកបដោយខ្យល់បរិយាកាសធម្មជាតិ ជាពិសេសនោះគឺ មានផ្ទះមាត់ទឹក កញ្ចុះមាត់ទឹក ផ្ទះកុងទីន័រ ផ្ទះតង់ និងតំបន់ទឹកធ្លាក់នៅក្បែរនោះ គួរជាទីមនោរម្យ និង ស្រស់ស្រាយក្រៃលែង៕
រូបភាព ៖ Pursat Provincial Hall