ឱ្យតែដល់ថ្ងៃទី ១ ខែមេសា គេនាំគ្នាលេងថ្ងៃ «April Fools’ Day» មានដឹងថាដើមកំណើតចេញពីណាឬអត់?
ជារៀងរាល់ឆ្នាំ ឱ្យតែដល់ថ្ងៃទី ០១ ខែមេសា ថ្ងៃ «April Fools’ Day» គឺតែងតែត្រូវបានបណ្ដាប្រទេសជាច្រើនលើសកលលោកនាំគ្នាប្រារព្ធលេងទៅតាមទំនៀមទម្លាប់ផ្សេងៗគ្នា ក្នុងបំណងជាការលេងសើចជាមួយនរណាម្នាក់។
ដោយសារតែថ្ងៃទី ០១ ខែមេសានេះ មហាជនជាច្រើនរីករាយ នឹងការលេងសើច ភូតកុហកជាមួយមិត្តភក្តិ មិត្តរួមការងារ ឬ សូម្បីតែសមាជិកក្រុមគ្រួសារនោះ ឥលូវនេះ «ប្រជាប្រិយ» នឹងធ្វើការទម្លាយពីដើមកំណើត ក៏ដូចជាប្រវត្តិដែលផ្ដើមឱ្យចេញថ្ងៃ «April Fools’ Day» នេះឡើង។
បើតាមការស្រាវជ្រាវបានឱ្យដឹងថា «April Fools’ Day» ត្រូវបានគិតថា កើតឡើងដំបូងនៅក្នុងឆ្នាំ ១៥៨២ អំឡុងពេលបារាំង បានធ្វើការផ្លាស់ប្ដូរប្រតិទិនរបស់ខ្លួនពី ប្រតិទិន Julian មកជាប្រតិទិន Gregorian វិញ។ តាមប្រតិទិនកាលពីមុន ថ្ងៃចូលឆ្នាំ គឺប្រារព្ធធ្វើឡើងនៅចន្លោះចុងខែមីនា និង ០១ មេសានេះឯង ប៉ុន្តែក្រោយប្ដូរប្រតិទិនថ្មី ដូចនេះថ្ងៃចូលឆ្នាំគឺប្រារព្ធធ្វើឡើងនៅថ្ងៃទី ០១ ខែមករា វិញ។
ដូច្នេះហើយ បាននៅពេលនរណាប្រារព្ធធ្វើថ្ងៃចូលឆ្នាំនៅចុងខែមីនា រហូតដល់ថ្ងៃទី ០១ មេសា ពួកគេគឺតែងតែត្រូវបានគេសើចចំអក និង ហៅថា «April fools»។ បន្ថែមពីនេះទៀត អ្នកដែលមិនព្រមដើរតាមប្រតិទិនថ្មីនោះ នឹងត្រូវបានគេលេងសើច ដោយយករូបត្រីក្រដាស យកទៅបិទលើខ្នងអ្នកទាំងនោះ រួចគេក៏ហៅអ្នកទាំងនោះថា «April Fish» (សត្វត្រីត្រូវបានគេតំណាងឱ្យភាពល្ងង់ខ្លៅ)។
ការលេងសើចក្នុងថ្ងៃទី ០១ មេសានេះដែរ ក៏ត្រូវបានមនុស្សប្រារព្ធធ្វើឡើងជារៀងរាល់ឆ្នាំរហូតមកទល់សព្វថ្ងៃនេះ ទៅតាមទម្រង់ និង ទំនៀមទម្លាប់របស់ប្រទេសនីមួយៗ៕
