ជឿថាឆ្នាំខ្លាឆ្នាំកាច ពលរដ្ឋចិន និង តៃវ៉ាន់ ផ្អើលនាំគ្នាអត់យកកូនក្នុងឆ្នាំនេះ
ដោយសារតែជំនឿជឿថាសត្វខ្លា គឺតំណាងឱ្យភាពកាចសាហាវ ប្រជាពលរដ្ឋចិន និង តៃវ៉ាន់ ជាញឹកញាប់គឺតែងតែបញ្ចៀសការយកកូននៅក្នុងឆ្នាំមួយនេះ ដែលបណ្ដាលឱ្យអត្រាកំណើតក្នុងឆ្នាំខ្លា គឺមានការធ្លាក់ចុះ។
កាលពីសប្ដាហ៍មុន ភ្នាក់ងារសុខភាព និង សុខុមាលភាពប្រចាំកោះតៃវ៉ាន់ បានប្រកាសថា ពួកគេនឹងបង្កើនចំនួនទឹកប្រាក់សម្រាប់ថែទាំកូនអាយុក្រោម ២ ឆ្នាំរហូតដល់ ១៨០ ដុល្លារ និង ប្រាក់ឧបត្ថម្ភលើការថែទាំរហូតដល់ ៣០៦ ដុល្លារ ក្នុងមួយខែ។ នេះគឺជាការជួយមួយចំណែករបស់តៃវ៉ាន់ ក្នុងការបញ្ចៀសពលរដ្ឋខ្លួន កុំឱ្យមានការភ័យខ្លាចក្នុងការផ្ដល់កំណើតកូនក្នុងឆ្នាំខ្លានេះ។
តាមស្ថិតិរបស់រដ្ឋាភិបាលតៃវ៉ាន់បានឱ្យដឹងថា រៀងរាល់ឆ្នាំឱ្យតែដល់ឆ្នាំខាល អត្រាកំណើតគឺតែងកាត់បន្ថយប្រមាណ ២០ ០០០ នាក់ បើប្រៀបទៅនឹងឆ្នាំដទៃៗទៀត ដែលបានធ្វើឱ្យមានការប៉ះពាល់ដល់រចនាសម្ព័ន្ធប្រជាជនដែលកំពុងធ្លាក់ចុះស្រាប់លើកោះមួយនេះ។
ជាមួយគ្នានេះដែរ ផ្នត់គំនិតនៃការកំណត់អត្រាកំណើតក្នុងឆ្នាំខាល ក៏រកឃើញថាជារឿងធម្មតាក្នុងប្រទេសចិនផងដែរ។ ទិន្នន័យដែលបានមកពីវិបសាយ Statista បានបង្ហាញឱ្យឃើញថា អត្រាកំណើតនៅប៉េកាំងក្នុងឆ្នាំខាល កាលពីឆ្នាំ ២០១០ គឺមានចំនួន ៧.២៧ នាក់ក្នុងចំណោមពលរដ្ឋ ១ ពាន់នាក់ ហើយអត្រាធ្លាក់ទាបបំផុតគឺក្នុងអំឡុងឆ្នាំ ២០០៩ ដល់ ២០១៩។
ផ្នត់គំនិតដែលមិនចង់បានកូនកើតក្នុងឆ្នាំខាល គឺនៅតែជារឿងដ៏ឱ្យបារម្ភមួយរបស់ពលរដ្ឋជាច្រើន។ ជាក់ស្ដែង កាលពីសប្ដាហ៍កន្លងទៅ រដ្ឋាភិបាលចិន បានចេញរបាយការណ៍បង្ហាញពីអត្រាកំណើនប្រជាជន គឺបានធ្លាក់មកកម្រិតទាបក្នុងរយៈពេល ៦១ ឆ្នាំ ដោយកាលពីឆ្នាំ ២០២១ អត្រាកំណើតគឺមានចំនួនលើសអត្រាស្លាប់៕