ខ្លាចគេស្អប់ខ្ពើម ទើបចេញពីគុកបានមួយថ្ងៃ បែកគំនិតចង-កស្ល-ា.ប់
មហាជនរំជួលចិត្តអត់អាណិតមិនបាន ក្រោយឃើញស្ត្រីជាម្តាយម្នាក់យំកើតទុកស្ទើរប្រេះទ្រូង ព្រោះទើបតែឃើញមុខកូនប្រុសចេញពីគុកមិនទាន់បានមួយថ្ងៃស្រួលបួលផង គេបែរជាដាច់ចិត្តចងកស្លាប់ ដោយសារតែខ្លាចអ្នកស្រុកនាំគ្នាស្អប់ខ្ពើម។
តាមព័ត៌មានបានឱ្យដឹងថា អ្នកស្លាប់នេះ មានអាយុ ២៤ ឆ្នាំ ជាអ្នកស្រុកឧដនថានី ប្រទេសថៃ ត្រូវបានគេប្រទះឃើញចងកស្លាប់កណ្តាលផ្ទះកាលពីថ្ងៃទី ២៥ ខែមករា ឆ្នាំ ២០២២ កន្លងទៅនេះ ហើយប៉ូលិសក៏បានពិនិត្យរួចរាល់ហើយថា គេពិតជាបានស្លាប់ដោយសារតែការចងកពិតមែន។
តាមឪពុកអ្នកស្លាប់បានឱ្យដឹងថា គេបានជាប់គុកជាង ២ ឆ្នាំមកហើយ ដោយសារតែករណីលួចទ្រព្យសម្បត្តិ ហើយទើបតែបានចេញមកវិញនៅថ្ងៃទី ២៤ ខែមករា ឆ្នាំ ២០២២ កន្លងទៅប៉ុណ្ណោះ។ នៅថ្ងៃកើតហេតុ គេក៏បានអង្គុយហូបបាយជុំគ្នាធម្មតាជាមួយគ្រួសារ ហើយថែមទាំងទៅជួយធ្វើសំណង់ពុកម៉ែទៀត ប៉ុន្តែសុខៗគេក៏បានចេញមកមុនបាត់។ ក្រោយមកដោយសារតែឈឺបត់ជើងឪពុកចុងក៏បានត្រលប់មកផ្ទះ ស្រាប់តែឃើញកូនប្រុសចងកស្លាប់ផុតដង្ហើមបាត់ទៅហើយ។
ដោយឡែក អ្វីដែលកាន់តែស្រណោះ គឺស្រ្តីជាម្តាយបាននិយាយទាំងទឹកភ្នែកថា អ្នកស្លាប់រូបនេះ គឺជាកូនប្រុសពៅ ដោយខ្លួនទើបតែទៅទទួលចេញពីគុកប៉ុណ្ណោះ ហើយនៅថ្ងៃចេញ គេបានសន្យាថានឹងកែខ្លួនឈប់ធ្វើឱ្យម្តាយពិបាកចិត្ត ព្រមទាំងនឹងទៅធ្វើទាហានថែមទៀតផង តែបែរជាមកចងកស្លាប់ឱ្យម្តាយរឹតតែប្រេះទ្រូងទៅទៀត។
យ៉ាងណាមិញ បើបងស្រីអ្នកស្លាប់បានឱ្យដឹងពីមូលហេតុនៃការស្លាប់ថា ប្រហែលជាប្អូនប្រុសខ្លាចអ្នកស្រុកស្អប់ខ្ពើមរើសអើង ព្រោះរូបគេធ្លាប់ជាក្មេងពាលាអាវ៉ាសែណាស់ ទើបដល់ថ្នាក់បញ្ចប់ជីវិតខ្លួនឯងបែបនេះ៕