ភ្លេចៗខ្លួន! ស្ពានខ្សែកាបឫស្សីកែវ សាងសង់បាន ៦៣.៧ % ហើយ គ្រោងសង់ចប់នៅពេលមួយនេះ
មន្ទីរសាធារណៈការ និង ដឹកជញ្ជូន រាជធានីភ្នំពេញ នៅថ្ងៃទី ២៥ ខែមករា ឆ្នាំ ២០២២ បានបញ្ជាក់ឱ្យបានដឹងថា គិតត្រឹមថ្ងៃទី ២៥ ខែមករា ឆ្នាំ ២០២២ ការដ្ឋានសាងសង់ស្ពានបេតុង អារមេខ្សែកាបឫស្សីកែវ ឆ្លងកាត់ទន្លេសាប សម្រេចលទ្ឋផលបាន ៦៣.៧% ហើយ។
ក្នុងនោះ បើតាមការបញ្ជាក់បន្ថែម ពីមន្ទីរសាធារណៈការ និង ដឹកជញ្ជូន រាជធានីភ្នំពេញ បានឱ្យដឹងទៀតថា តាមផែនការគម្រោងសាងសង់នឹងបញ្ចប់នៅខែមីនា ឆ្នាំ ២០២៣ នាពេលខាងមុខ ដែលស្ពាននេះចំណាយទឹកប្រាក់ប្រមាណជាង ៣៥ លានដុល្លារ លើកាវិនិយោគសាងសង់។
គួរឱ្យដឹងផងដែរថា ចំពោះគម្រោងស្ពានខ្សែកាបឫស្សីកែវ នេះ មានរចនាបទទំនើប ដែលមានសរសរធំចំនួន ៤បង្គោល មានកំពស់រហូតដល់ ៤០ ម៉ែត្រ សម្រាប់ព្យួរខ្សែកាប។ ស្ពានបេតុងនេះ ស្ថាបនានៅអមជាមួយស្ពានបាឡេ មានប្រវែង ៩២២ ម៉ែត្រ មានទទឹង ២០,៥ ម៉ែត្រ។
ដោយឡែក ចិញ្ចើមស្ពាន សម្រាប់ថ្មើរជើង មានទទឹង ១,២៥ ម៉ែត្រ សងខាង , កម្ពស់សរសរស្ពាន សម្រាប់ព្យួរខ្សែកាបធៀបនឹងកម្រាលស្ពាន ៣៤ ម៉ែត្រ។ សរសរសម្រាប់ព្យួរ ខ្សែកាបមានសរសរចំនួន ៤, គន្លងខ្សែយានយន្ត ទទឹង៣.៧៥ ម៉ែត្រ , គន្លងធ្វើចរាចរ ២ ខ្សែទៅ ២ខ្សែមក , កម្ពស់នាវាចរ ក្រោមស្ពានអតិបរមានៅរដូវវស្សា ១០.៥ ម៉ែត្រ , កម្ពស់នាវាចរ ក្រោមស្ពាន អប្បរមា នៅ រដូវប្រាំង ២០,៥ ម៉ែត្រ បំពាក់បង្គោលភ្លើងបំភ្លឺនិងដាក់ ស្លាកសញ្ញាចរាចរ៕
ប្រភព ៖ មន្ទីរសាធារណៈការ និងដឹកជញ្ជូន រាជធានីភ្នំពេញ