ណាត់គ្នាឱ្យហើយទៅ! អាទិត្យក្រោយ នៅសៀមរាបមានបុណ្យបង្ហោះខ្លែង និង រាំស្គរដៃ ក្នុងស្រុកបន្ទាយស្រី
តាមរៈទំព័រហ្វេសប៊ុក អភិបាលស្រុកបន្ទាយស្រី លោក ឃឹម ហ្វីណង់ បានឱ្យបានដឹងថា នៅថ្ងៃទី ១៩ ខែធ្នូ ឆ្នាំ ២០២១ ខាងមុខនេះ ចាប់ពីម៉ោង ២ រសៀលតទៅ រដ្ឋបាលស្រុកបន្ទាយស្រី រៀបចំព្រឹត្តិការណ៍ទេសចរណ៍វប្បធម៌ថ្មីមួយ នៅលើទឹកដីភូមិសសី នៃឃុំត្បែង នោះគឺ «បុណ្យខ្លែងបន្ទាយស្រី» ដើម្បីឱ្យអ្នកទេសចរ បានស្គាល់ពីប្រពៃណីបង្ហោះខ្លែង ក៏ដូចជាបង្អួតបង្ហាញពីទេសភាពធម្មជាតិ ដ៏ស្រស់ត្រកាលនៃជើងភ្នំគូលែន និង ទាក់ទាញភ្ញៀវទេសចរ ឱ្យមកស្គាល់ភូមិទេសចរណ៍ដែលទើបតែមានការអភិវឌ្ឍថ្មីៗមួយនេះ។
អភិបាលខេត្តគំរូរូបនេះ បានបញ្ជាក់ឱ្យដឹងទៀតថា ពិធីខាងលើនេះ នឹងត្រូវប្រារព្ធឡើងនៅទីតាំងក្នុងរមណីយដ្ឋានឯកជនដ៏ស្រស់ស្អាតមួយឈ្មោះ ភូមិលំហែសសី ដែលម្ចាស់ទីតាំង បានស្ម័គ្រចិត្ត ផ្តល់ជូនទីកន្លែងដោយមិនគិតថ្លៃ ដែលប្រិយមិត្តអាចដាក់កន្ទេល និង ខ្ចប់ម្ហូបអាហារ យកទៅពិកនិក ជាលក្ខណៈគ្រួសារបានផងដែរ តែរាល់សំរាមទាំងអស់ ត្រូវតែខ្ចប់យកទៅវិញរៀងៗខ្លួន។
ដោយឡែក ចំពោះការបង្ហោះខ្លែងវិញ ក្រុមការងារ នឹងមានរៀបចំស្តង់លក់ខ្លែងតូចៗ សម្រាប់ផ្តល់ឱកាស ឱ្យមានការបង្ហោះខ្លែងកម្សាន្តសប្បាយជាលក្ខណៈគ្រួសារផងដែរ។ មិនតែប៉ុណ្ណោះ កម្មវិធីនេះ នឹងមានបន្ថែមកម្មវិធីតូចៗទៀតដូចជា រាំវង់តន្ត្រីស្គរដៃ ស្តង់លក់អាហារសម្រន់ និង បញ្ចប់ដោយកម្មវិធីមើលព្រះច័ន្ទពេញវង់ រះរំលងភ្នំគូលែន ត្រឹមម៉ោង ៨ យប់៕