ផ្ទុះការចាប់អារម្មណ៍ខ្លាំង! បក្សីនៅខ្មែរមួយប្រភេទ ស៊ីតែសត្វពស់ជាអាហារ ភាគច្រើនរស់នៅតំបន់មួយនេះ
ជារឿងដ៏គួរឱ្យចាប់អារម្មណ៍ បក្សីមួយប្រភេទមានរាងតូចល្មម តែមានភាពក្លាហាន ក្នុងការរកចំណីចិញ្ចឹមជីវិតរបស់វា ដោយស៊ីតែសត្វពស់ជាអាហារ និងរស់នៅតាមព្រៃស្រោង ព្រៃល្បោះ និងដំណុះព្រៃក្មេង ព្រៃជាំជាដើម។
បក្សីប្រភេទនេះ ត្រូវបានគេស្គាល់ឈ្មោះថាជា អកពស់ព្រៃ មានឈ្មោះវិទ្យាសាស្ត្រថា Spilornis cheela មានស្លាបពណ៌ត្នោតក្រម៉ៅ ពេលហើរទៅ មានឆ្នូតគែមក្រោមនៃស្លាបពណ៌ខ្មៅ ដងខ្លួនមានអុជៗស ពាសពេញ និងមានកំប៉ោយក្រាស់ មានឆ្នូតទទឹងខ្មៅធំនៅចុងកន្ទុយ ជាប្រភេទសត្វដែលតែងតែបន្តពូជ ចាប់ពីខែមករា ដល់ ខែតុលា និងមានពង ចំនួនតែ ១ គត់។
ថ្មីៗនេះផងដែរ ក្រុមអ្នកអភិរក្ស បានរកឃើញបក្សីប្រភេទ អកពស់ព្រៃ នេះនៅលើដើមឈើ និង ហោះស្វែងរកអាហាររបស់វា ដែលមានកម្ពស់ ប្រមាណ ២០ ម៉ែត្រពីដី និងមានទីតាំងស្ថិតនៅក្នុងដែនជម្រកសត្វព្រៃលំផាត់ ក្នុងភូមិសាស្ត្រខេត្តមណ្ឌលគិរី។ ការរក្សាបាននូវបក្សីប្រភេទកម្របែបនេះ គឺកើតចេញពីការខិតខំប្រឹងប្រែង របស់មន្រ្តីឧទ្យានុរក្ស ក្នុងការទប់ស្កាត់បទល្មើសធនធានធម្មជាតិ ដោយសហការជាមួយក្រុមការងារសិក្សាស្រាវជ្រាវជីវៈចម្រុះ ក្រោមការជួយឧបត្ថម្ភពី គម្រោងកាំប៉ាស់និងអង្គការ Birdlife៕
ប្រភព ៖ មន្ទីរបរិស្ថាន ខេត្តមណ្ឌលគិរី