ស្ថិតនៅចម្ងាយប្រមាណជាង ៣០០ គីឡូម៉ែត្ រពីរាជធានីភ្នំពេញ ខេត្តសៀមរាប ជាគោលដៅទេសចរណ៍ ដែលឆាប់ឆក់ដួងចិត្តប្រិយមិត្ត ឱ្យចង់ទៅទស្សនាកម្សាន្ត ដោយសារតែទីនោះជាទឹកដីអង្គរ សម្បូរទៅដោយប្រាង្គប្រាសាទដែលជាកេរ្តិ៍ដំណែលជាតិ រួមទាំងសម្បូរទៅដោយកន្លែងលម្ហែបែបធម្មជាតិថ្មីៗជាច្រើន គួរឱ្យចង់ទៅសម្រាកកម្សាន្ត ស្រាកស្រាន្តរំសាយរាល់ទុក្ខកង្វល់ទាំងឡាយក្នុងជីវិត។
ដូច្នេះហើយ ថ្ងៃនេះ «ប្រជាប្រិយ» សូមណែនាំនូវតំបន់លម្ហែបែបធម្មជាតិមួយកន្លែង ស្ថិតក្នុងភូមិសាស្ត្រស្រុកបន្ទាយស្រី ទឹកដីខេត្តសៀមរាប ដែលនៅទីនោះ មានឈ្មោះថា «ភូមលំហែសសី»។
«សសី» ជាកន្លែងដែលអាចផ្តល់នូវរសជាតិជីវិតមួយបែប ជាតំបន់ដែលមានទេសភាពវាលស្រែ អមជាប់នៅក្បែរជើងភ្នំ ម្តុំមាត់អូរ អាចអង្គុយលេងមើលផ្កាយរះក្នុងពេលរាត្រី ដុតភ្លើងអាំងត្រី និងអាចបោះតង់សម្រាកបានផងដែរ។
មិនតែប៉ុណ្ណោះ នៅទីនោះ មានខ្យល់អាកាសធម្មជាតិដ៏បរិសុទ្ធ ដលអាចផ្តល់ឱ្យប្រិយមិត្ត នូវអារម្មណ៍ពិត ជាមួយទេសភាពដ៏ស្រស់ត្រកាល អាចបន្ធូរបន្ថយនូវរាល់ទុក្ខកង្វល់ទាំងឡាយទាំងពួងបានផងដែរ៕
រូបភាពដោយ ៖ ទៅលេងបន្ទាយស្រី
