សត្វឆ្កែ ដែលមានជាងគេលើលោក មានវីឡាស្កឹមស្កៃ អ្នកបម្រើឆ្វេងស្ដាំ និងតៃកុងឡានផ្ទាល់ខ្លួន
ក្នុងអំឡុងឆ្នាំ ១៩៩១ ស្ត្រីជាអ្នកមានស្តុកស្តម្ភសញ្ជាតិអាល្លឺម៉ង់ម្នាក់ឈ្មោះ Karlotta Leibenstein បានទទួលមរណភាព ដែលទ្រព្យសម្បត្តិហូរហៀររបស់នាងដែលនៅសេសសល់លើលោកនេះទាំងប៉ុន្មាន គឺត្រូវប្រគល់ឱ្យសត្វឆ្កែចិញ្ចឹមរបស់នាងមួយក្បាល ដោយសារតែនាងគ្មានសាច់ញាតិ។
ហេតុនោះហើយ ទើបបានជាសត្វឆ្កែប្រភេទ German Shepherd ឈ្មោះ Gunther III និងសមាជិកពូជពង្សរបស់វា បានក្លាយជាសត្វឆ្កែដែលមានទ្រព្យសម្បត្តិច្រើនជាងគេបំផុតលើពិភពលោក។ បើគិតតាំងពីអំឡុងជំនាន់ឆ្នាំ ៩០ មក តាំងពីទ្រព្យនៅជារបស់ Gunter III គឺមានប្រមាណជា ១០០ លានដុល្លារ ដែលមកទល់ពេលនេះទ្រព្យសម្បត្តិរបស់ពួកគេគឺកើតឡើងដល់ទៅ ៤ ដងឯណោះ។
សត្វឆ្កែ Gunter IV ដែលបន្តវេនពី Gunter III បច្ចុប្បន្នកំពុងរស់នៅ Miami រដ្ឋ Florida សហរដ្ឋអាមេរិក ដែលរូបវាមានទ្រព្យសម្បត្តិសរុបចំនួន ៣៧៥ លានដុល្លារ។ កាលពីឆ្នាំ ២០០០ Gunter IV បានទិញផ្ទះវីឡាដ៏ប្រណីតជាង ៦៥០ ម៉ែត្រការ៉េពីតារាចម្រៀង Madonna ហើយវាក៏ជាម្ចាស់វីឡាប្រណីតៗមួយចំនួនទៀតនៅ Bahamas ផងដែរ។
ងាកមកជីវិតរស់នៅរបស់សត្វឆ្កែអភិជននេះវិញ គឺប្រៀបបីដូចជាចៅហ្វាយវ័យក្មេងដូច្នោះដែរ។ កាលវិភាគប្រចាំថ្ងៃរបស់ Gunter IV គឺរួមមានការបរិភោគអាហារ ការសម្រាកកាយ និងការលំហែលេង។ ជាធម្មតា Gunter IV រត់លេងនៅក្នុងបន្ទប់ដេកម្ចាស់របស់គេ ជិះឡានទំនើបដើរលេងដោយមានអ្នកបើកឡានផ្ទាល់ខ្លួន ពេលផឹកពេលស៊ី គឺតែងតែមានអ្នកបម្រើឆ្វេងស្ដាំជានិច្ច។
បន្ថែមពីនេះទៅទៀត គ្រួសារឆ្កែត្រកូល Gunther ក៏ជាម្ចាស់ក្រុមហ៊ុនមួយផងដែរ ដែលក្រុមហ៊ុននោះ បុគ្គលិកគឺជាអ្នកទទួលខុសត្រូវ និងធានាថាទ្រព្យរបស់ពួកគេដំណើរការលូតលាស់ល្អ៕
