ជាទូទៅគេសង្កេតឃើញថាមានមុខរបរចំនួន ៣ ដែលសមស្របសម្រាប់ប្រជាពលរដ្ឋខ្មែរមិនសូវមានដើមទុន ពោលគឺត្រឹម ១០០ ទៅ ៣០០ ដុល្លារប៉ុណ្ណោះ តែអាចរកចំណូលដោះស្រាយជីវភាពក្រុមគ្រួសារបានសមរម្យ ។ ចង់ដឹងថាមានរបរអ្វីខ្លះសូមអានអត្ថបទខាងក្រោមនេះ ៖
១-របរលក់នំបញ្ចុក
របរលក់នំបញ្ចុកបានក្លាយជាមុខរបរពេញនិយម និង ជារបរមួយដែលស្រ្តីភាគច្រើនបានចាប់យក និង បានយិតយោងជីវភាពពួកគាត់ឱ្យចាកផុតពីភាពក្រីក្រ ។ បើតាមស្រ្តី ឈ្មោះ គាំរុន អាយុ ៤៩ ឆ្នាំ មានស្រុកកំណើតនៅភូមិអណ្តូងសំរិទ្ធ ឃុំធ្លាប្រជុំ ស្រុកកោះអណ្តែត ខេត្តតាកែវ បច្ចុប្បន្នប្រកបរបរលក់នំបញ្ចុកនៅក្រុងភ្នំពេញ បានបង្ហើបឱ្យដឹងថា សម្រាប់អ្នកដែលគ្មានមុខរបរហើយចង់ប្រកបរបរលក់នំបញ្ចុកដូចគាត់បើមានដើមទុនត្រឹម ១០០ ដុល្លារ គឺអាចរែកនំបញ្ចុកដើរលក់បាន គ្រាន់តែនឿយបន្តិច តែបើមានដើមទុនដល់ ៣០០ ដុល្លារគឺអាចធ្វើជារទេះរុញនំបញ្ចុកដើរលក់វាធូរកម្លាំងជាង ព្រមទាំងលក់បានច្រើនជាងការរែកដើរលក់ ។
២-របរលក់ពងទាកូន
ស្រ្តីលក់ពងទាកូនម្នាក់ដែលបានលក់ពងទាកូននៅខាងក្រោយផ្សារសាមគ្គី ផ្លូវ ១២២ សង្កាត់ផ្សារដេប៉ូ ៣ ខណ្ឌទួលគោក ឈ្មោះសួរ វួចនី អាយុ ៥០ ឆ្នាំ មានបទពិសោធក្នុងរបរនេះច្រើនឆ្នាំមកហើយ ដោយក្នុង ១ ថ្ងៃលក់ពងទាកូនបានយ៉ាងហោចពី ៥០០ ទៅ ៦០០ គ្រាប់ បានបង្ហើបឱ្យដឹងថា ត្រឹមតែមានដើមទុន ២០០ ទៅ ៣០០ ដុល្លារអាចចាប់របរលក់ពងទាកូនបានហើយ ពោលគឺឱ្យតែមានចិត្តចង់ពិតប្រាកដ ក្នុងនោះសំខាន់ត្រូវមានកន្លែងលក់ច្បាស់លាស់ ចេះធ្វើជ្រក់ខ្ទឹមសម្រាប់ជ្រលក់ពងទាកូនឱ្យមានរសជាតិឆ្ងាញ់ត្រូវតាមចំណង់ចំណូលចិត្តអតិថិជន ។ ការចេះធ្វើឱ្យពងទាកូនមានរសជាតិឆ្ងាញ់មានអនាម័យមិនទាន់គ្រប់គ្រាន់ទេ សំខាន់អ្នកលក់ត្រូវចេះរួសរាយរាក់ទាក់អតិថិជន ទើបអាចទាក់ទាញភ្ញៀវឱ្យចង់ចូលម្តងហើយម្តងទៀត ។
៣-របរលក់លៀសហាល
លៀសហាលជាអាហារដែលប្រជាជនខ្មែរភាគច្រើនចូលចិត្តទទួលទាន ព្រោះវាមានរសជាតិឆ្ងាញ់ មិនចំណាយប្រាក់ច្រើន និង មានច្រើនរសជាតិតាមតម្រូវការទៀតផង ។សម្រាប់អ្នកចង់ប្រកបរបរនេះមានដើមទុនត្រឹមតែ ១០០ ទៅ ២០០ ដុល្លារក៏អាចធ្វើបានសំខាន់ ឱ្យតែមានរទេះរុញ ឬ ម៉ូតូដឹកដើរលក់ ។ ដោយសារតែលៀសហាលមានប្រជាប្រិយភាពខ្លាំងទាំងនៅក្នុងទីក្រុង និង នៅទីជនបទ ទើបគេសង្កេតឃើញថាអ្នកលក់លៀសហាលបច្ចុប្បន្ននេះបានចាប់ផ្តើមបង្កើតភាពច្នៃប្រឌិតឡើង ដោយខ្លះដាក់លក់លើម៉ូតូ ខ្លះដាក់ក្នុងកញ្ចក់ ។
ស្រ្តីលក់លៀសហាលម្នាក់ឈ្មោះ ស៊ីនួន បានឱ្យដឹងថា ក្នុងមួយថ្ងៃៗគាត់អាចលក់បានប្រហែលជា ៣០ គីឡូក្រាម ទៅ ៤០ គីឡូក្រាម ហើយក្នុងមួយគីឡូក្រាមអាចចំណេញប្រមាណ ២៥០០ រៀលដែរ ហេតុនេះជាមធ្យមយើងសល់លុយប្រហែល ៨ ម៉ឺនរៀលក្នុងមួយថ្ងៃ ៕
អត្ថបទដោយ៖ ដេវីត
