គិតយ៉ាងណា! ពេលសារភាពគេធ្វើហីៗ ដល់កាត់ចិត្តបានហើយទើបមកប្រាប់ថាស្រឡាញ់ដែរ

ស្នេហាប្រៀបដូចជាខ្សែភាពយន្តមួយរឿង ។ រឿងមួយអាចត្រូវបន្ត ឬ បញ្ចប់អាស្រ័យលើអ្នកដឹកនាំរឿង ខណៈពេលដែល ស្នេហាអាចទៅមុខបានឬអត់អាស្រ័យលើចិត្ត និង បេះដូងរបស់មនុស្សម្នាក់ដែលបង្កប់ដោយអារម្មណ៍ស្រឡាញ់នរណាម្នាក់ ឬ ក៏លែងមែនអារម្មណ៍បែបនោះទៀត ។ ស្នេហាអាចអាស្រ័យលើអារម្មណ៍ ជាជាងហេតុផលអ្វីទាំងអស់ ដូចដែលគេតែងលើកឡើងថា ស្នេហាគ្មានលក្ខខណ្ឌ ស្រឡាញ់មនុស្សម្នាក់គ្មានហេតុផល ។

ចុះបើស្រឡាញ់គេខ្លាំងរហូតសម្រេចចិត្តទៅសារភាពប្រាប់នាង ប៉ុន្តែនាងបែជាធ្វើហីៗ មិនផ្តល់ចម្លើយ ហាក់បីដូចជាគេមិនចាប់អារម្មណ៍ពីអ្នក រហូតដល់ពេលមួយដែលអ្នកអាចកាត់ចិត្តពីនាងបានហើយ បែជានាងមកប្រាប់ថានាងក៏ស្រឡាញ់អ្នកវិញដែរ អុីចឹងគួរគិតយ៉ាងណា បើខំកាត់ចិត្តទំរាំបាន ?

ប្រសិនបើអ្នកស្រឡាញ់មនុស្សម្នាក់ដោយពិតប្រាកដ ស្មោះអស់ពីដួងចិត្ត អ្នកក៏មិនងាយនឹងឈប់ស្រឡាញ់រូបនាងដែរ ទោះបីជាអ្នកមិនទាន់ទទួលបានចម្លើយពីនាងក៏ដោយ ។ វាមិនអាក្រក់ទេដែលគ្រាន់តែចំណាយពេលរងចាំនាងបន្តិច ដើម្បីឱ្យនាងបានសម្រេចចិត្ត ។

យ៉ាងណាមិញ អ្នកក៏អាចសួរបេះដូងខ្លួនឯងថា តើអ្នកពិតជានៅស្រឡាញ់នាងទៀតឬទេ បន្ទាប់ពីបានឆ្លងកាត់ភាពប្រងើយបន្តើយពីនាង ឬ បន្ទាប់ពីពេលវេលាដែលធ្លាប់តែស្និតស្នាល ប្រែមកជាគ្មាននិយាយគ្នាមួយម៉ាត់ ? បើអ្នកពិតជាកាត់ចិត្តបាន ឬ ក្នុងអារម្មណ៍អ្នកលែងមាននាងទៀតហើយនោះ អាចមានន័យថា ការសារភាពរបស់អ្នកគ្រាន់តែជាការស្រឡាញ់មនុស្សស្រីម្នាក់តែមួយឆាវប៉ុណ្ណោះ ហើយអ្នកក៏នឹងឃើញអ្នកថ្មីទៀត ដែលមិនមែននាងក៏គ្មានបញ្ហា ។

ដូច្នេះ វាមិនអាស្រ័យថា តើប្រើពេលយូរប៉ុណ្ណា ដើម្បីទទួលបានចម្លើយ​យល់ព្រមពីមនុស្សដែលអ្នកស្រឡាញ់នោះទេ ប៉ុន្តែ វាអាស្រ័យថាតើអ្នកស្រឡាញ់នាងដល់កម្រិតណា ឬ តើអ្នកពិតជាស្រឡាញ់នាងពិតប្រាកដ ឬ​អត់ ៕