ថ្ងៃនេះ «ប្រជាប្រិយ» នឹងបង្ហាញពីរបៀបធ្វើយ៉ាងហ៊ន ដែលជាម្ហូបឡាវយ៉ាងឆ្ងាញ់មួយឆ្នាំងតូចល្មម សម្រាប់គ្នា ៤ ទៅ ៥ នាក់ទទួលទាន ។ តស់! កុំឱ្យខាតពេលយូរ មកដឹងពីវិធីចម្អិនវាទាំងអស់គ្នា ៖
-របៀបធ្វើយ៉ាហន
គ្រឿងផ្សំ៖ ខ្ទិះដូង, ម្ទេសក្រៀម ចិញ្ច្រាំឲ្យម៉ត់ (ចង់បានសម្លក្រហមល្អ ដាក់ឲ្យច្រើនបន្តិច), កាពិ ( ដាក់ក៏បានមិនដាក់ក៏បានតាមការចូលចិត្ត), គ្រឿងសាតេ, ប្រេងអូលីវ, ស្ករត្នោត, ម្សៅស៊ុប, អំបិល, ប៊ីចេង, ទឹកស៊ុប (អត់ទឹកស៊ុបអាចប្រើទឹកដូងជំនួសបាន), ស្លឹកក្រូចសើច, ខ្ទឹមសចិញ្ច្រាំឲ្យម៉ត់, សណ្ដែកដីលីង បុកឲ្យរាងម៉ត់បន្តិច, សាច់គោ, បង្គា, មឹក, បន្លែ, ស្ពៃបូកគោ និង ផ្សិត ។
វិធីធ្វើយ៉ាហន ៖ ដាក់ឆ្នាំងទុកឲ្យក្ដៅ រួចដាក់ខ្ទិះដូងចូល ទុកឲ្យពុះ ហើយដាក់ស្លឹកក្រូចសើច ខ្ទឹមសចិញ្ច្រាំ កាពិ ម្ទេសក្រៀម គ្រឿងសាតេ រួចកូរឲ្យរលាយចូលគ្នាអស់ ទុកឲ្យពុះឡើងឈ្ងុយ ។ បន្ទាប់មកដាក់ស្ករត្នោត ម្សៅស៊ុប អំបិល ប៊ីចេង ប្រេងអូលីវ និង ទឹកដោះគោខាប់ចូលបន្តិច កូរឲ្យសព្វជាមួយគ្រឿង រួចចាក់ទឹកស៊ុប ឬ ទឹកដូងចូល រួចភ្លក់មើលឲ្យល្មម តាមការចូលចិត្ត (មុខម្ហូបនេះធ្វើកុំឲ្យប្រៃ) ទើបដាក់សណ្ដែកដីចូល កូរឱ្យសព្វ រួចជាការស្រេច ។
ដួសចេញមកដាក់ឆ្នាំងដែលត្រូវទទួលទាន ហើយមកដាក់លើចង្កានវិញ ដោយប្រើភ្លើងតិចៗ និង ដាក់ជាមួយសាច់គោ គ្រឿងសមុទ្យ តាមការចូលចិត្តរបស់លោកអ្នក ជ្រលក់ជាមួយទឹកតៅហ៊ូ ។ នំបញ្ចុក អាចស្រូបញុំាជាមួយទឹកយ៉ាហនបាន ។
របៀបធ្វើទឹកតៅហ៊ូ ៖ ដាក់ខ្លាញ់ចូលក្នុងខ្ទះ ដាក់ខ្ទឹមសបំពងចូលឲ្យឈ្ងុយ រួចដាក់តៅហ៊ូ (តៅហ៊ូដប) ហើយដាក់ស្ករស និង ប៊ីចេងបន្តិច កូរឱ្យសព្វចូលជាតិ ភ្លក់មើលឲ្យល្មមកុំឲ្យប្រៃពេក រួចជាការស្រេច ៕
ប្រភព៖ ចុងភៅ
រូបភាព៖ fb
