សាច់ក្រក គឺជាប្រភេទម្ហូបក្រៀមក្រោះម្យ៉ាង ដែលអាចទុកបានយូរ និងងាយស្រួលចំអិនញុំាម្តងៗ ប៉ុន្តែវិធីធ្វើសាច់ក្រកវិញ ក៏មិនពិបាកដូចគ្នា។ ថ្ងៃនេះយើងមក ដឹងពីរបៀបធ្វើសាច់ក្រកជ្រូកម្តង ។
របៀបធ្វើសាច់ក្រកជ្រូក
+ គ្រឿងផ្សំ
– សាច់ជ្រូកចិញ្ច្រាំ ៥០០ក្រាម
– សាច់បីជាន់ចិញ្ច្រាំ ៥០០ក្រាម
– បាយស ១០០ក្រាម
– គល់ស្លឹកគ្រៃ ហាន់ស្តើងៗ ១ស្លាបព្រាបាយ
– ខ្ទឹមស ៥-៦កំពឹស
– ទឹកត្រី ១ស្លាបព្រាបាយ
– ស្ករស ១ស្លាបព្រាកាហ្វេ
– អំបិល ១ស្លាបព្រាកាហ្វេ
– ម្រេចម៉ត់ ១ស្លាបព្រាបាយ
– ម្សៅស៊ុប ១ស្លាបព្រាបាយ
– ពោះវៀនជ្រូក ១ខ្សែ (សម្រាប់ច្រកសាច់)
+ វិធីធ្វើ
១. យកពោះវៀនជ្រូក លាងទឹកជាមួយអំបិលឲ្យស្អាត ទាំងក្នុង និងក្រៅ រួចស្រង់ទុកមួយអន្លើ
២. យកគល់ស្លឹកគ្រៃ និងខ្ទឹមស ដាក់បុកចូលគ្នាឲ្យម៉ត់ រួចដួសទុកមួយអន្លើ
៣. យកចានដាក់សាច់ជ្រូក និងសាច់បីជាន់ចិញ្ច្រាំចូលគ្នា រួចដាក់លាយជាមួយគល់ស្លឹកគ្រៃ ខ្ទឹមស ដែលបុកហើយ និងចាក់ទឹកត្រី ស្ករស អំបិល ម្រេច និងម្សៅស៊ុបច្របល់ចូលគ្នា រួចដាក់បាយសចូល ច្របល់ចូលគ្នាឲ្យសព្វ
៤. បន្ទាប់មកយកសាច់ដែលលាយគ្រឿងហើយ ញាត់ចូលក្នុងពោះវៀនជ្រូក រួចអស់ហើយ យកខ្សែចងដើម្បីធ្វើជាដុំៗ តាមចំណូលចិត្ត (រួចយកទៅហាលក៏បាន អត់ក៏បាន)
៥. រួចយកទៅអាំង បំពង ឬចៀន តាមចំណូលចិត្តជាការស្រេច ៕
ប្រភពៈ Lalinn like cooking
