សូមអរគុណ! ធនាគារពិភពលោកប្រគល់ប្រាក់ ឱ្យកម្ពុជា ២០ លានដុល្លារ ដើម្បីប្រយុទ្ធនឹងជំងឺកូវីដ ១៩
កាលពីថ្ងៃទី២ ខែមេសា ឆ្នាំ២០២០ ធនាគារពិភពលោក (World Bank) បានសម្រេចផ្តល់ថវិកាពី International Development Association (IDA) ចំនួន ២០លានដុល្លារមកដល់កម្ពុជាក្នុងគម្រោងឆ្លើយតបគ្រាអាសន្ននៃកូវីដ១៩ (Cambodia COVID-19 Emergency Response Project) ។
លោកស្រី Inguna Dobraja អ្នកចាត់ការរបស់ធនាគារពិភពលោកប្រចាំប្រទេសកម្ពុជាបានឱ្យដឹងថា៖ “ការផ្តល់ហិរញ្ញវត្ថុដំបូងនេះនឹងជួយឱ្យកម្ពុជាអាចប្រឈមមុខជាមួយនឹងជំងឺជាសាកលដែលមិនធ្លាប់មានពីមុនមកនេះ តាមរយៈការផ្គត់ផ្គង់ បរិក្ខារពេទ្យដែលជាតម្រូវការសម្រាប់ការធ្វើតេស្ត និងព្យាបាលកូវីដ១៩ កាត់បន្ថយការរីករាលដាល ពង្រឹងសមត្ថភាពឆ្លើយតបជំងឺរាតត្បាតជាសកលនេះ ព្រមទាំងបង្រួញពេលវេលាស្រោចស្រង់សេដ្ឋកិច្ច និងសង្គមផងដែរ” ។
គម្រោងនេះនឹងផ្តល់ហិរញ្ញវត្ថុក្នុងការសាងសង់ទីតាំងសម្រាប់ការដាក់នៅដោយឡែក ក៏ដូចជាព្យាបាលអ្នកជំងឺកូវីដ១៩ និងពង្រីកលទ្ធភាព ចំនួនបន្ថែមនៃបន្ទប់ពិសោធក្នុងមន្ទីរពេទ្យ ឬបង្អែកនៅតាមបណ្ដារាជធានី ខេត្តទាំង ២៥ នៅក្នុងប្រទេសកម្ពុជា ។ ក្រៅពីនោះ គឺកម្ពុជាក៏អាចមានលទ្ធភាពគ្រប់គ្រាន់ក្នុងការចំណាយទៅលើថ្នាំ និងបរិក្ខាពេទ្យដែលចាំបាច់សម្រាប់ការព្យាបាល ។
បន្ថែមពីនោះទៀត ថវិកាចំនួន ២០លានដុល្លារនេះ ក៏អាចចូលរួមក្នុងគម្រោងដើម្បីគាំទ្រការត្រៀមប្រយុទ្ធប្រឆាំងនឹងកូវីដ១៩ របស់ក្រសួងសុខាភិបាលនៃព្រះរាជាណាចក្រកម្ពុជា ក្នុងការបន្ថែមចំនួនបុគ្គលិកពេទ្យ និង កម្មវិធីវឹកហាត់បន្ថែមផ្សេងៗ ៕
ប្រភព៖ World Bank
