ក្រសួងអំពាវនាវកុំឱ្យបងប្អូនប្រើឧបករណ៍តេស្តិ៍កូវីដ ១៩ ដោយខ្លួនឯង តាមការផ្សព្វផ្សាយខុសច្បាប់

យោងតាមសេចក្តីប្រកាសរបស់ក្រសួងសុខាភិបាលនៅព្រឹកថ្ងៃទី ២៩ ខែមីនា ឆ្នាំ ២០២០ នេះបានឱ្យដឹងថា ចំនួនអ្នកឆ្លងកូវីដ ១៩ នៅកម្ពុជាបានកើនម្នាក់ទៀតហើយ សរុបកើនដល់ ១០៣ នាក់ ដែលអ្នកឆ្លងទី ១០៣ នេះគឺជាស្ត្រីជនជាខ្មែរអាយុ ៣៦ ឆ្នាំ បម្រើការនៅក្នុងហាងស្តាធីវី (Star TV) រស់នៅភូមិប៉ាលេឡៃ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។ ក្នុងនោះដែរក៏មានករណីព្យាបាលជាសះស្បើយចំនួន ៨ ករណីបន្ថែម សរុប ២១ ករណី ។

ក្នុងសេចក្តីប្រកាសនេះទៀតសោត ក្រសួងសុខាភិបាលនៃពញរះរាជាណាចក្រកម្ពុជាក៏បានអំពាវនាវដល់ប្រជាពលរដ្ឋទាំងអស់ថា សូមកុំប្រើឧបករណ៍តេស្តិ៍រកមេរោគកូវីដ ១៩ ដោយខ្លួនឯង តាមការឃោសនាផ្សព្វផ្សាយមិនពិតពីបុគ្គ ឬ ការផ្សព្វផ្សាយខុសច្បាប់មួយចំនួនបែបអណាធិបតេយ្យឡើយ ដោយក្រសួងបានបញ្ជាក់យ៉ាងច្បាស់ថា មានតែនៅវិទ្យាស្ថានជាតិស្រាវជ្រាវសុខភាពសាធារណៈ និង វិទ្យស្ថានជាតិប៉ាស្ទ័រកម្ពុជាប៉ុណ្ណោះ ទើបមានការទទួលស្គាល់ត្រឹមត្រូវ ។

ជាមួយគ្នានេះ ក្រសួងក៏បានស្នើឱ្យមានការចាត់វិធានការច្បាប់យ៉ាងតឹងរ៉ឹងដល់ជនណា ឬ ក្រុមហ៊ុនណាក៏ដោយ ដែលមានការផ្សព្វផ្សាយពីឧបករណ៍តេស្តិ៍រកមេរោគកូវីដ ១៩ ដោយមិនមានការអនុញ្ញាតិពីក្រសួងសុខាភិបាកកម្ពុជា ៕