នៅមុននេះបន្តិច រោងភាពយន្តដ៏ធំនៅប្រទេសកម្ពុជា លេជេន (Legend Cinemas) បានចេញសេចក្ដីជូនដំណឹងស្ដីពីការផ្អាកបម្រើសេវាកម្មនានានៅរោងភាពយន្តជាបណ្ដោះអាសន្ត ដើម្បីឆ្លើយតបនឹងការប្រកាសរបស់ក្រសួងសុខាភិបាល ដែលបានចេញសេចក្ដីប្រកាសឱ្យផ្អាកដំណើរការរោងភាពយន្តទាំងអស់នៅកម្ពុជា នៅថ្ងៃទី ១៧ ខែមីនា ឆ្នាំ ២០២០ នេះ ។
យោងតាមទំព័រហ្វេសប៊ុកផេកផ្លូវការរបស់រោងភាពយន្ត លេជេន បានចេញសេចក្ដីជូនដំណឹងដូចតទៅ «សួស្តី អតិថិជនជាទីស្រឡាញ់របស់រោងភាពយន្តលេជេនទាំងអស់គ្នា នេះជាការជូនដំណឹងមួយដ៏សំខាន់ ក្នុងការផ្អាកដំណើរការជាបណ្តោះអាសន្នរបស់រោងភាពយន្តពួកយើង សម្រាប់អតិថិជនដែលធ្វើការជាវសំបុត្រទាំងតាមអនឡាញ និង នៅបញ្ជរលក់សំបុត្រផ្ទាល់ អាចអញ្ជើញយកសំបុត្រមកប្ដូរជាសាច់ប្រាក់វិញបាននៅសាខា រោងភាពយន្តលេជេនដែលលោកអ្នកបានជាវ ចាប់ពីពេលជូនដំណឹងនេះ រហូតដល់រសៀលថ្ងៃស្អែក (ថ្ងៃ 18 ខែមេសា ឆ្នាំ 2020)»៕
