រដ្ឋបាលរាជធានីភ្នំពេញ ប្រគល់ជូនម៉ូតូរ៉ឺម៉កកង់បីសម្រាប់ប្រមូលសំរាមដល់ខណ្ឌទាំង ១៤ បន្ថែមទៀត !

កន្លងមករដ្ឋបាលរាជធានីភ្នំពេញបានប្រគល់ជូននូវម៉ូតូរម៉កកង់បី ដល់េដ្ឋបាលខណ្ឌមួយចំនួនរួចមកហើយ ដើម្បីដឹកជញ្ជូនសំរាមនៅក្នុងភូមិសាស្ត្រមូលដ្ឋានរបស់ខ្លួន ហើយឥឡូវនេះ រដ្ឋបាលរាជធានីភ្នំពេញក៏បានផ្តល់ជូននូវម៉ូតូរម៉កកងបីមួយចំនួនទៀតដល់រដ្ឋបាលខណ្ឌទាំង១៤ នៅក្នុងរាជធានីភ្នំពេញ ។

នៅរសៀលថ្ងៃទី១៨ ខែកុម្ភៈ ឆ្នាំ២០២០ រដ្ឋបាលរាជធានីភ្នំពេញបានរៀបចំពិធីប្រគល់ម៉ូតូរ៉ឺម៉កកង់បីដល់រដ្ឋបាលខណ្ឌទាំង១៤ក្នុងរាជធានីភ្នំពេញ សម្រាប់ប្រើប្រាស់ការងារបរិស្ថាន និងការងារសណ្តាប់ធ្នាប់ តាមមូលដ្ឋាន ដែលមានសង្កាត់ទាំងអស់ចំនួន១០៥ ។ ពិធីប្រគល់នេះគឺជាលើកទី៣ ដោយមានវត្តមានឯកឧត្តម កើត ឆែ អភិបាលរងរាជធានីភ្នំពេញ តំណាងឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានប្រគល់ម៉ូតូរ៉ឺម៉កកង់បី សរុបទាំងបីលើកគឺមានចំនួន១០៥គ្រឿង ដោយក្នុងមួយសង្កាត់ទទួលបានម៉ូតូរ៉ឺម៉កកង់បីចំនួន០១គ្រឿង និង រដ្ឋាករស្វយ័តផ្សារធំថ្មីចំនួន០១គ្រឿង ។

កន្លងមក ប្រជាពលរដ្ឋមានការរអ៊ូរទាំយ៉ាងខ្លាំង អំពីការយឺតយ៉ាវក្នុងការប្រមូលសំរាមនៅតាមភូមិសាស្ត្រមួយចំនួន នៅក្នុងរាជធានីភ្នំពេញ ដោយមានកន្លែងខ្លះបានទុកសំរាមរហូតដល់ស្អុយរលួយជះក្លិនមិនល្អ ដល់អ្នករស់នៅក្បែរនោះ ៕