សឹងដាច់ផ្ញារ បង្ហាញជីវិតហ៊ឺហាចោរមាសនៅថៃ ជិះឡាន BMW ពាក់ស្បែកជើង Adidas តម្លៃរាប់ម៉ឺនដុល្លារ នៅតែធ្វើចោរទៀត!
ហេតុការណ៍ការប្លន់ហាងមាសប្រដាប់អាវុធ ក្នុងផ្សារទំនើបមួយនៃ ខេត្តលពបុរី បានធ្វើឱ្យមានការភ្ញាក់ផ្អើលយ៉ាងខ្លាំងទូទាំងប្រទេសថៃ ដោយហេតុការណ៍នេះបានបណ្តាលឱ្យមានមនុស្សស្លាប់ចំនួន ៣ នាក់ស្លាប់ ។
យ៉ាងណាមិញមកដល់ពេលនេះ ជនសង្ស័យជាចោរប្លន់ហាងមាសនោះ ត្រូវបានអគ្គស្នងការនគរបាលជាតិថៃ លោក Chakthip Chaiyachinda កំណត់អត្តសញ្ញាណបាន និង ចាប់ខ្លួនបានហើយ ដោយរូបគេមានឈ្មោះ Prasittichai Khaokaew ជានាយកសាលារៀនមួយកន្លែង មានវ័យ ៣០ ឆ្នាំជាង ហើយពេលនេះកំពុងប្រមូលភ័ស្តុតាង ដើម្បីធ្វើការតាមនីតិវិធីច្បាប់ ។
អ្វីដែលគួរឱ្យចាប់អារម្មណ៍ បើងាកមកមើលពីជីវិតឯកជនរបស់ជនសង្ស័យចោររូបនេះវិញ គឺពិតជារស់នៅក្នុងជីវិតហាយសូរយ៉ាងខ្លាំង ដោយមានផ្ទះយ៉ាងធំត្រដឹមត្រដែត ប្រើប្រាស់រថយន្តទំនើប BMW ដែលមានតម្លៃកប់ក្តោង ។ អ្វីដែលពិសេស សូម្បីសម្ភារមួយចំនួនទៀតក៏សុទ្ធតែម៉ាកល្បីៗដែរ ដូចជា នាឡិកាដៃ និង គ្រាន់តែស្បែកជើងពាក់លេងក៏ជាម៉ាក Adidas មានតម្លៃខ្ទង់ម៉ឺនដុល្លារដែរ ដែលទាំងនេះបានធ្វើឱ្យមានការភ្ញាក់ផ្អើលយ៉ាងខ្លាំងក្នុងស្រទាប់មហាជនថៃ ដោយគេមិននឹកស្មានថា មានជីវិតរស់នៅសុខស្រួលបែបនេះហើយ ហេតុអ្វីក៏នៅតែប្រព្រឹត្តទង្វើសង្គមស្អប់ខ្ពើមទៀត ៕
