ជាទូទៅប្តីប្រពន្ធដែលការហើយថ្មីថ្មោង តែងតែរំភើប ជាមួយនឹងជីវិតគូដែលពួកគេធ្លាប់បានទន្ទឹងជាយូរមកហើយ ។ យ៉ាងណាមិញពួកគេក៏មិនគួររំជើបរំជួលចំណាយលុយជាមួយរឿងទាំង ៥យ៉ាងខាងក្រោមនេះឡើយ ទោះបីជាចំណេញចំណងដៃយ៉ាងណាក៏ដោយ ព្រោះវាអាចនឹងទៅជាចំណងវិញ ។ រឿងដែលប្ដីប្រពន្ធទើបតែរៀបការហើយមិនគួរចំណាយមានដូចជា៖
១. ទិញរបស់របរប្រ៊េនៗច្រើនហួសហេតុ
សម្រាប់អ្នកមានលុយចាយមិនអស់វាមិនសូវជាបញ្ហានោះទេពេលដែលគេចង់ទិញរបស់របរដែលថ្លៃកប់ពពកយ៉ាងណាក៏ដោយ ។ ប៉ុន្តែសម្រាប់ប្តីប្រពន្ធដែលមានលទ្ធភាពមធ្យម មិនគួរណាចំណាយលុយដែលសល់ពីរៀបការទៅទិញរបស់ថ្លៃៗមកប្រើដោយធ្វើជាកាដូជូនគ្នានោះឡើយ ។ មុននឹងទិញក៏គួរគិតពីជីវភាពខ្លួនឯងសិន ។
២. ដើរកម្សាន្តយូរពេក
ប្តីប្រពន្ធដែលរៀបការហើយច្រើនតែចង់ទៅដើរកម្សាន្តទាំងក្នុង និង ក្រៅប្រទេសដែលហៅថា ការទៅក្រេបទឹកឃ្មុំ ។ ប៉ុន្តែបើរវល់តែក្រេបទឹកឃ្មុំយូរពេក ភ្លេចគិតការងារ ការរកស៊ី វានឹងមានតែខាតបង់ទាំង ពេលវេលា និងថវិការ ។ ប្តីប្រពន្ធគួរតែបានចំណាយពេលរៀបចំគម្រោងគ្រួសារឱ្យបានច្រើនល្អជាង ។
៣. ចូលហាងញឹកញាប់
ប្រាកដណាស់បើមួយថ្ងៃៗគិតតែចូលហាង បាយនៅខាងក្រៅ នោះស្វាមីភរិយាថ្មី មិនត្រឹមតែបាត់បង់លុយកាក់ច្រើនតែប៉ុណ្ណោះទេ តែសុភមង្គលគ្រួសារក៏អាចនឹងត្រូវថមថយដែរ ។
៤. ជួបជុំញាតិមិត្តផឹកស៊ីច្រើនពេក
ពេលការហើយ ទាំងសងខាងនឹងកើនញាតិមានទាំង សាច់ញាតិខាងប្តី និងខាងប្រពន្ធដែលរស់នៅកន្លែងខុសៗគ្នា ។ ដូចនេះគួរជៀសវាងជួបជុំម្តងផ្ទះអ្នកនេះ ម្តងផ្ទះអ្នកនោះ ដោយប្តូរមកជាការជួបជុំទាំងអស់គ្នាប្រសើរជាង ។ បើគិតតែពីទៅផឹកស៊ី ឱ្យគ្រប់ផ្ទះបែបនេះ វាមិនចម្រើននោះឡើយ ។
៥. រៀបចំពិធីកាត់ចំណងដៃធំហួស
មានគ្រួសារខ្លះ បន្ទាប់ពីរៀបការមិនខ្វល់ខ្វាយពីពិធីកាត់ចំណងដៃអ្វីឡើយ តែខ្លះក៏រៀបពិធីនេះស្ទើរតែប៉ុនពិធីរៀបការទៅហើយ ។ ពេលខ្លះចង់ចំណេញ ក៏អាចក្លាយទៅជាចំណងក៏ថាបាន ៕
អត្ថបទដោយ៖ ចាន់ត្រា
