ការស្រាវជ្រាវមួយបានរកឃើញថា មនុស្សដែលមានវ័យលើសពី ៤០ ឆ្នាំឡើង ប្រសិនបើធ្វើការងារលើស ៣ ថ្ងៃក្នុងមួយសប្ដាហ៍ នោះអាចធ្វើឱ្យពួកគេមានអារម្មណ៍ស្ត្រេសមិនសប្បាយចិត្ត និង អាចប៉ះពាល់ដល់សមត្ថភាពចំណេះដឹង។
តាមរយៈរបាយការណ៍មួយដកស្រង់ចេញពីវិទ្យាស្ថានអនុវត្តសេដ្ឋកិច្ច និង ស្រាវជ្រាវសង្គមប្រចាំទីក្រុង Melbourne បានបង្ហាញការគាំទ្រលើមតិគំនិតនៃការបំពេញការងារត្រឹមរយៈពេល ៤ ថ្ងៃក្នុងមួសប្ដាហ៍ ដោយផ្អែកលើការវិនិច្ឆ័យពីផលប៉ះពាល់នៃសមត្ថភាពចំនេះដឹងអំឡុងម៉ោងបំពេញការងារ។
អ្នកស្រាវជ្រាវនៅមហាវិទ្យាល័យ University of Melbourne បានរកឃើញទំនាក់ទំនងរវាងអាយុ និង ផលិតភាពការងារដែលបានទាក់ទាញចំណាប់អារម្មណ៍មនុស្សជាច្រើនតាំងពីរបាយការណ៍បានបញ្ចេញក្នុងឆ្នាំ ២០១៦ មក។ ក្នុងការសិក្សានោះបានរកឃើញថា បុគ្គលមាមអាយុលើស ៤០ ឆ្នាំ អាចបំពេញការងារទទួលបានផលិតភាពខ្ពស់ នៅពេលដែលពួកគេធ្វើការមិនលើសពី ៣ ថ្ងៃក្នុងមួយសប្ដាហ៍។
ជាក់ស្ដែង ការស្រាវជ្រាវខាងលើបានសិក្សាលើបុរសចំនួន ២៩៦៥ នាក់ និង មនុស្សស្រី ៣៥០២ នាក់ (សុទ្ធតែជាជនជាតិអូស្ត្រាលី) ដោយពួកគេតម្រូវឱ្យធ្វើតេស្ដចំណេះដឹងមួយចំនួន។ តេស្តទាំងនោះរួមមាន ការអានអត្ថបទឮៗ អានត្រឡប់ថយក្រោយវិញ និង ការផ្គូរផ្គងលេខ និង អក្សរ ក្នុងពេលវេលាដែលបានកំណត់។ ការតេស្តនេះដែរ អ្នកស្រាវជ្រាវធ្វើឡើងក្នុងបំណងវាយតម្លៃមើលលើការចងចាំ និង ជំនាញយល់ដឹងរបស់អ្នកចូលរួម។
ក្រោយការតេស្ត ពួកគេបានរកឃើញថា អ្នកចូលរួមដែលមានវ័យកណ្ដាលធ្វើការចន្លោះពី ២៥ ទៅ ៣០ ម៉ោងក្នុងមួយសប្ដាហ៍ គឺមានការកើនឡើងសមត្ថភាពខួរក្បាល ដែលក៏បន្តកើនឡើងជាមួយនឹងពេលកើនឡើងដែរ។ យ៉ាងណាមិញ ការបំពេញការងារលើសពេលវេលាខាងលើនេះក៏ជះឥទ្ធិពលអវិជ្ជមានផងដែរ ដោយវាអាចធ្វើឱ្យបុគ្គលនោះមានអារម្មណ៍ស្ត្រេស និង ហត់នឿយ។
ជាលទ្ធផលដែលអ្នកស្រាវជ្រាវរកឃើញក្នុងការសិក្សានេះ ពួកគេបានគិតថា បរិមាណពេលវេលាបំពេញការងារគឺសំខាន់ណាស់ក្នុងការរក្សាសមត្ថភាពខួរក្បាលរបស់មនុស្សវ័យកណ្ដាល ឬ មនុស្សវ័យចំណាស់។ សរុបមក ការងារក្រៅម៉ោងអាចជាជម្រើសដ៏ល្អក្នុងការរក្សាសមត្ថភាពខួរក្បាលលើក្រុមមនុស្សនៅវ័យនេះ ដូចដែលការសិក្សារបស់យើងបានរកឃើញថា ការបំពេញការងារហួសប្រមាណគឺអាចប៉ះពាល់ដល់សមត្ថភាពខួរក្បាលរបស់ពួកគេបាន។ លើសពីនេះ ការសិក្សាក៏រកឃើញទៀតថា អ្នកដែលធ្វើការ ៥៥ ម៉ោងក្នុងមួយសប្ដាហ៍ បង្ហាញថាបញ្ហាចំណេះដឹងគឺអាក្រក់ជាងអ្នកដែលចូលនិវត្តន៍ ឬអ្នកគ្មានការងារធ្វើទៅទៀត៕
ប្រភព៖ 9GAG
