ប្រិយមិត្តមួយចំនួនអាចនឹងបានដឹងរួចមកហើយថា កាលពីថ្ងៃទី ១៩ ខែឧសភា ឆ្នាំ ២០២៥ កន្លងទៅ ទីភ្នាក់ងារប៉ូលិសស៊ើបអង្កេតនៃក្រសួងសន្តិសុខសាធារណៈ បានធ្វើការចាប់ខ្លួននាង Nguyen Thuc Thuy Tien ជាបណ្ដោះអាសន្ន ជុំវិញករណីបោកប្រាស់អតិថិជនពាក់ព័ន្ធនឹងផលិតផលស្ករគ្រាប់ Kera។ ការសម្រេចចិត្តចាប់ខ្លួន Miss Grand International 2021 ជាផ្លូវការនេះដែរ គឺកើតមានឡើងក្រោយប៉ូលិសពង្រីកការស៊ើបអង្កេតលើករណីផលិតផលិតផលក្លែងក្លាយពាក់ព័ន្ធនឹងក្រុមហ៊ុន Asia Life Joint Stock និង ក្រុមហ៊ុន Chi Em Rot។
នាង Thuy Tien គឺជាម្ចាស់ភាគហ៊ុនមួយរួមចំណែកលើដើមទុន ៣០% ក្នុងការផលិតផលិតផលនោះ ហើយនាងក៏ទទួលបានកុំមុយស្យុងជិត ៧ ពាន់លានដុង (ប្រមាណ ២៦ ៩៦៩៧ ដុល្លារ) ផងដែរ។ លើសពីនេះទៅទៀត បើទោះជានាងបានដឹងថា សារធាតុ fiber នៅក្នុងផលិតផលមានកម្រិតទាបខ្លាំង ហើយមិនមានប្រសិទ្ធភាពដូចអ្វីដែលនាងបានផ្សព្វផ្សាយក៏ដោយ ប៉ុន្តែនាង និង ក្រុមការងារខ្លួន នៅតែបន្តផ្ដល់ព័ត៌មានក្លែងក្លាយដើម្បីបោកប្រាស់អតិថិជនរបស់ខ្លួនដដែល។ បន្ទាប់មក ក្រោយទទួលរងការរិះគន់ខ្លាំងពីមហាជន នាង Thuy Tien ក៏បានដាក់ស្នើចុះកុងត្រាលើការផ្សព្វផ្សាយរបស់ខ្លួនឱ្យត្រូវតាមច្បាប់ ដើម្បីគេចពីការចាត់ទុកថាជាម្ចាស់ភាគហ៊ុនម្នាក់ដែរ។
យ៉ាងណាមិញ ក្រោយការចាប់ខ្លួនស៊ើបអង្កេតអស់រយៈពេលជាច្រើនខែមកនេះ ទីបំផុត កាលពីថ្ងៃទី ១៩ ខែវិច្ឆិកា ឆ្នាំ ២០២៥ កន្លងទៅ តុលាការប្រជាជនក្រុងហូជីមិញ ប្រទេសវៀតណាម ក៏បានសម្រេចកាត់ទោសឱ្យនាង Thuc Thuy Tien ជាប់ពន្ធនាគាររយៈពេល ២ ឆ្នាំ លើបទល្មើសបោកប្រាស់អតិថិជន រួមទាំងពិន័យជាសាច់ប្រាក់ចំនួន ៥០ លានដុង (១៩០០ ដុល្លារ)៕
ប្រភព៖ VN Express
